കൊച്ചി: സിഎംആര്‍എല്‍- എക്‌സാലോജിക് മാസപ്പടിക്കേസില്‍ പ്രതിപക്ഷ നേതാവ് പിണറായി വിജയന്റെ മകള്‍ വീണയുടെ സ്വത്ത് കണ്ടുകെട്ടുന്നത് സംബന്ധിച്ച് ദല്‍ഹിയിലെ ഇ ഡി അഡ്ജുഡിക്കേറ്റിങ് അതോറിറ്റി ഈ ആഴ്ച അനുമതി നല്കിയേക്കും. വ്യാഴാഴ്ചയോടെ അനുമതി ലഭിക്കുമെന്നാണ് ഇപ്പോള്‍ പ്രതീക്ഷിക്കുന്നത്. കണ്ടുകെട്ടല്‍ നടപടികള്‍ പൂര്‍ത്തിയായ ശേഷമായിരിക്കും പിണറായിയെ ചോദ്യം ചെയ്യാന്‍ വിളിപ്പിക്കുകയെന്നാണ് വിവരം.
അങ്ങനെയാണെങ്കില്‍ അടുത്ത ആഴ്ചയോടെയായിരിക്കും പിണറായി വിജയനെ ചോദ്യം ചെയ്യാന്‍ വിളിപ്പിക്കുക. ചോദ്യം ചെയ്യുന്നത് സംബന്ധിച്ച് ഇ ഡി ഡയറക്ടര്‍ രാഹുല്‍ നബീന്‍ അനുമതി നല്‍കിയതായാണ് സൂചന. ഇ ഡി സ്പെഷല്‍ ഡയറക്ടര്‍ പ്രശാന്ത് കുമാര്‍ കേസുകളുടെ അവലോകനത്തിനായി കൊച്ചിയിലെത്തിയപ്പോള്‍ പിണറായിയെ ചോദ്യം ചെയ്യുന്നത് സംബന്ധിച്ച ചര്‍ച്ച നടന്നിരുന്നു. ഡയറക്ടര്‍ രാഹുല്‍ നവീന്റെ അനുമതി വാങ്ങിയശേഷം മതിയെന്നായിരുന്നു തീരുമാനം. പിണറായിയെ ചോദ്യം ചെയ്യുന്നതിന്റെ ഭാഗമായി ഈ ആഴ്ച തന്നെ സമന്‍സ് നല്‍കും. ഇതിനായി ചോദ്യാവലി തയാറാക്കുന്നുണ്ട്.
എക്സാലോജിക്കിനും ഡയറക്ടറായ വീണയ്‌ക്കും പണംനല്‍കിയത് പിണറായിയുമായുള്ള വ്യക്തിബന്ധത്തിന്റെ പേരിലായിരുന്നുവെന്നാണ് സിഎംആര്‍എല്‍ എംഡി എസ്.എന്‍. ശശിധരന്‍ കര്‍ത്ത 2024 ഏപ്രില്‍ 17-ന് ഇ ഡിക്ക് മൊഴിനല്‍കിയത്. എന്റര്‍പ്രൈസ് റിസോഴ്സ് പ്ലാനിങ് (ഇആര്‍പി) സേവനങ്ങളൊന്നും നല്‍കാതെയായിരുന്നു പണം കൈമാറ്റമെന്നുമായിരുന്നു മൊഴി. ഐടി കണ്‍സള്‍ട്ടന്‍സി സേവനങ്ങളുടെ പേരില്‍ 2.78 കോടി ലഭിച്ചത് സേവനങ്ങളൊന്നും നല്‍കാതെയാണെന്ന് വീണ സമ്മതിച്ചതായും ഇ ഡി റിപ്പോര്‍ട്ടിലുണ്ട്. കര്‍ത്തയുടെ മൊഴിയാണ് പിണറായിക്ക് കുരുക്കായിരിക്കുന്നത്. ഇതിന്റെ അടിസ്ഥാനത്തിലാകും പിണറായിയെ ചോദ്യംചെയ്യുക.
ഇല്ലാത്ത ഐടി കണ്‍സള്‍ട്ടന്‍സിയുടെ പേരില്‍ എക്സാലോജിക്കിന് സിഎംആര്‍എല്‍ 1.72 കോടി നല്‍കിയിട്ടുണ്ടെന്ന് 2019 ജനുവരി 25ന് ആദായനികുതി വകുപ്പ് നടത്തിയ റെയ്ഡില്‍ കണ്ടെത്തിയെന്നാണ് വിവരം. ഇതുള്‍പ്പെടെ വീണയ്‌ക്കും കമ്പനിക്കും 2.78 കോടി രൂപ കരാറുകളിലൂടെ നല്‍കുകയായിരുന്നു. ഇന്‍വോയിസ് പോലുമില്ലാതെയാണ് ലക്ഷങ്ങള്‍ വീണ കൈപ്പറ്റിയിരുന്നത്.
