ചെന്നൈ: എല്‍ടിടിഇ നേതാവ് പ്രഭാകരനാണ് രാജീവ് ഗാന്ധിയെ കൊലചെയ്തതിന്റെ സൂത്രധാരന്‍. എന്നിട്ടും വിജയിന്റെ മന്ത്രിസഭയില്‍ രണ്ട് മന്ത്രിസ്ഥാനം വെച്ച് നീട്ടിയതോടെ രാഹുല്‍ ഗാന്ധി ഇതേക്കുറിച്ച് ഇതുവരെയും പ്രതികരിച്ചിട്ടു പോലുമില്ല.
തമിഴ്നാട് നിയമസഭാ തെരഞ്ഞെടുപ്പിന് മുന്‍പ് കോണ്‍ഗ്രസിന് മന്ത്രിസ്ഥാനം കൊടുക്കില്ലെന്ന് പറഞ്ഞ സ്റ്റാലിനോട് പകരം വീട്ടണം എന്നേ രാഹുല്‍ ഗാന്ധിയ്‌ക്കുള്ളൂ. 59 വര്‍ഷത്തെ ഇടവേളയ്‌ക്ക് ശേഷം കോണ്‍ഗ്രസിന് തമിഴ്നാട്ടില്‍ രണ്ട് മന്ത്രിസ്ഥാനങ്ങള്‍ ലഭിക്കുകയാണ്. വിജയ് കോണ്‍ഗ്രസിന് രണ്ട് മന്ത്രിസ്ഥാനങ്ങള്‍ നല്‍കിയപ്പോള്‍ അത് രാഹുല്‍ സ്വീകരിക്കുന്നത് കോണ്‍ഗ്രസിനെ നന്നാക്കാനല്ല, സ്റ്റാലിനെ വെല്ലുവിളിക്കാനാണ്. രാഹുല്‍ ഗാന്ധിയുടെ ഈ ഈഗോ തന്നെയാണ് കോണ്‍ഗ്രസിനെ തകര്‍ക്കുന്നതെന്ന് രാഷ്‌ട്രീയ നിരീക്ഷകര്‍ മുന്‍പേ വിലയിരുത്തിയിട്ടുള്ളതാണ്. ഇതുവഴി ഇന്ത്യാമുന്നണിയെന്ന ബിജെപിയ്‌ക്കെതിരായ പ്രതിപക്ഷ മുന്നണി ഉണ്ടാക്കിയ സ്റ്റാലിനെയാണ് രാഹുല്‍ ഗാന്ധി എന്നെന്നേയ്‌ക്കുമായി വെറുപ്പിച്ചത്.
എങ്ങിനെയാണ് എല്‍ടിടിഇ നേതാവ് പ്രഭാകരനെ വധിക്കാന്‍ സോണിയ ശ്രീലങ്കന്‍ സേനയെ സഹായിച്ചത്?
ഭര്‍ത്താവിന്റെ കൊലപാതകികളോട് പകരം വീട്ടിയത് സോണിയാഗാന്ധിയാണ്. അന്ന് കോണ്‍ഗ്രസ് ഭരണത്തിലിരിക്കുമ്പോഴാണ് എല്‍ടിടിഇ നേതാവ് പ്രഭാകരനെ വധിച്ച് സോണിയ പകരം വീട്ടിയത്. പ്രഭാകരനെ വധിക്കാന്‍ ശ്രീലങ്കന്‍ പ്രസിഡന്‍റ് മഹീന്ദ രാജപക്സെയ്‌ക്ക് എല്ലാവിധ സഹായവും സോണിയാഗാന്ധി ചെയ്തുകൊടുത്തിരുന്നു. അന്ന് കോണ്‍ഗ്രസ് ഭരണത്തില്‍ ചുക്കാന്‍ പിടിച്ചിരുന്നത് സോണിയാഗാന്ധിയാണ്.
എല്‍ടിടിഇയെ തകര്‍ക്കാന്‍ ശ്രീലങ്കയുടെ പട്ടാളക്കാര്‍ക്ക് ഇന്ത്യയില്‍ പ്രത്യേകപരിശീലനം നല്‍കാന്‍ സോണിയ അവസരമൊരുക്കി. ശ്രീലങ്കന്‍ സേനയ്‌ക്ക് സൈനക സാമഗ്രികള്‍ വാങ്ങാന്‍ ഇന്ത്യ 10 കോടി ഡോളര്‍ അന്ന് അനുവദിച്ചുകൊടുത്തു. എല്‍ടിടിഇയ്‌ക്ക് ആയുധം കിട്ടുന്നത് തടയാന്‍ പാക് കടലിടുക്കില്‍ ഇന്ത്യന്‍നാവികസേനാക്കപ്പല്‍ പട്രോള്‍ ചെയ്തിരുന്നു. ഇത് എല്‍ടിടിഇയ്‌ക്ക് കടല്‍വഴി ആയുധം ലഭിക്കുന്നതിന് തടസ്സമായി. സുകന്യ ക്ലാസില്‍ പെട്ട പട്രോളിംഗ് വാഹനങ്ങളും എം17 ഹെലികോപ്റ്ററും ശ്രീലങ്കന്‍ സേനയ്‌ക്ക് പ്രത്യേകമായി നല്‍കിയിരുന്നു. ഇതും സഹായകമായി. ശ്രീലങ്കയുടെ എല്‍ടിടിഇയ്‌ക്കെതിരായ സേനാ നടപടികള്‍ നിരീക്ഷിക്കാന്‍ മുന്നംഗ ടീമിനെതന്നെ സോണിയ നിയോഗിച്ചിരുന്നു. സുരക്ഷാ ഉപദേശകന്‍ എം.കെ. നാരായണന്‍, വിദേശസെക്രട്ടറി ശിവശങ്കര്‍ മേനോന്‍, പ്രതിരോധ സെക്രട്ടറി വിജയ് സിംഗ് എന്നിവരുള്‍പ്പെട്ടതായിരുന്നു ഈ സംഘം. മാത്രമല്ല, എല്‍ടിടിയുടെ വനത്തിലൂടെയുള്ള നീക്കങ്ങള്‍ കൃത്യമായി നിരീക്ഷിക്കാന്‍ ഇന്ത്യയുടെ ഉപഗ്രഹസേവനവും ശ്രീലങ്കന്‍ സേനയ്‌ക്ക് വിട്ടുനല്‍കിയിരുന്നു. ഇങ്ങിനെയെല്ലാമാണ് പ്രഭാകരനെ വധിച്ചതും എല്‍ടിടിഇയെ വേരോടെ തകര്‍ത്തതും.
വിജയിന്റെ നീക്കത്തിന് പിന്നില്‍ തമിഴ് രാജ്യമോ? പിന്നില്‍ മതപരിവര്‍ത്തന ലോബി അജണ്ട?
എന്നാല്‍ ഈ ഭൂതകാലമെല്ലാം മറന്നാണ് രാഹുല്‍ ഗാന്ധിയുടെ നീക്കം. പരസ്യമായാണ് വിജയ് എല്‍ടിടിഇ പ്രഭാകരനെയും എല്‍ടിടിഇയെയും പ്രകീര്‍ത്തിച്ചത്. മാത്രമല്ല, വിജയുടെ നീക്കത്തിന് പിന്നില്‍ വിശാല തമിഴകമെന്ന ദേശീയ സങ്കല്‍പമുണ്ടോ എന്ന് ഭീതിയും ഉയരുന്നുണ്ട്. ശ്രീലങ്കയിലെ എല്‍ടിടിഇ സ്വാധീനമുള്ള മേഖലയെയും തമിഴ്നാടിനെയും ഒരുമിപ്പിച്ചുകൊണ്ടുള്ള തമിഴകരാജ്യം ഡിഎംകെയുടെ സങ്കല്‍പമാണ്. അതുതന്നെയാണോ വിജയും പിന്തുടരുന്നത്? എങ്കില്‍ തമിഴ്നാട് പഞ്ചാബിലെ ഖലിസ്ഥാന്‍ വാദികളെപ്പോലെ വിഘടനവാദത്തിന്റെ ഈറ്റില്ലമാകും. ജോസഫ് വിജയിന്റെ പാര്‍ട്ടിയായ ടിവികെയെ പിന്തുണച്ചവരില്‍ ശ്രീലങ്കയില്‍ നിന്നുള്ള ചിലരും ഉണ്ടായിരുന്നതായി പറയുന്നു. ഇവാഞ്ചലിക്കല്‍ സംഘത്തിന്റെ അജണ്ടയിലുള്ളതാണ് എല്‍ടിടിഇയോടുള്ള അനുഭാവം എന്നും സംശയിക്കുന്നു. ശ്രീലങ്കയിലെ എല്‍ടിടിഇ മേഖലയിലും മതപരിവര്‍ത്തനം ശക്തമാണ്. ഈ ഇവാഞ്ചലിക്കല്‍ ടീമിന്റെ ആശയങ്ങളാണോ ഓരോ ദിവസവും വിജയ് പുറത്തെടുക്കുന്നത് എന്ന ആശങ്ക പരക്കെയുണ്ട്.
