ന്യൂദല്ഹി: ലോകകപ്പിന് 22 ദിവസങ്ങള് മാത്രം അവശേഷിക്കേ ഭാരതത്തിലെ ലോകകപ്പ് സംപ്രേഷണം സംബന്ധിച്ച അനിശ്ചിതത്വം തുടരവേ ഫിഫ അധികൃതര് ഭാരതത്തില്. ഫുട്ബോള് ലോകകപ്പ് സംപ്രേഷണം ഭാരതത്തില് ഏത് ചാനലിനു നല്കാം എന്നതു സംബന്ധിച്ച വില പേശലുകള് ഫിഫ അധികൃതര് തുടങ്ങി. ഫിഫ മീഡിയ റൈറ്റ്സ് ഉദ്യോഗസ്ഥരാണ് ഭാരതത്തിലെത്തിയത്. ഇവര് വിവിധ കമ്പനികളുമായി നേരിട്ട് ചര്ച്ച നടത്തും.
സംപ്രേഷണത്തുക സംബന്ധിച്ച തര്ക്കമാണ് ആരും ഏറ്റെടുക്കാത്തതിന് കാരണമായത്. ദൂരദര്ശന് ലോകകപ്പ് സംപ്രേഷണം ചെയ്തേക്കുമെന്ന വാര്ത്തകളുണ്ടായിരുന്നു. ഫിഫ ഫീഡ് ദൂരദര്ശന് നല്കാനുള്ള സാധ്യതയുണ്ട്. ഇതുസംബന്ധിച്ച് കോടതിയില് ഒരു ഹര്ജി നിലനില്ക്കുന്നുമുണ്ട്. ചൈനയിലെ സര്ക്കാര് ഉടമസ്ഥതയിലുള്ള മീഡിയ ഗ്രൂപ്പുമായി ഫിഫ ധാരണയിലെത്തിയിരുന്നു. കഴിഞ്ഞയാഴ്ചയാണ് കരാറിലെത്തിയത്.
ഭാരതത്തിലെ സംപ്രേഷണ കാര്യത്തില് മാത്രമാണ് ഇനി തീരുമാനമാകാനുള്ളത്. റിലയന്സ്-ഡിസ്നിയുമായി ഫിഫ നേരത്തെ ചര്ച്ച നടത്തിയെങ്കിലും ഫലം കണ്ടില്ല. സോണിയുമായുള്ള ചര്ച്ചകള് തുടരുകയാണ്. ആരും സംപ്രേഷണം ഏറ്റെടുത്തില്ലെങ്കില് ഫിഫയുടെ യു ട്യൂബ് ചാനല് വഴി തത്സമയം മത്സരങ്ങള് കാണാനാകുമെന്ന് ഫിഫ അധികൃതര് അറിയിച്ചിട്ടുണ്ട്.
