ഒസ്‌ലോ: ശുദ്ധമായ ഊര്‍ജ്ജം, വ്യാപാരം, സുസ്ഥിരത, ഡിജിറ്റലൈസേഷന്‍ തുടങ്ങിയ മേഖലകളിലെ ഉഭയകക്ഷി ബന്ധം കൂടുതല്‍ ശക്തിപ്പെടുത്തുന്നതിനുള്ള മാര്‍ഗങ്ങളെക്കുറിച്ച് ഐസ്ലാന്‍ഡ്, ഫിന്‍ലാന്‍ഡ്, ഡെന്‍മാര്‍ക്ക് എന്നിവിടങ്ങളില്‍ നിന്നുള്ള പ്രധാനമന്ത്രിമാരുമായി നരേന്ദ്ര മോദി പ്രത്യേക കൂടിക്കാഴ്ചകള്‍ നടത്തി. മൂന്നാമത് ഭാരതം- നോര്‍ഡിക് ഉച്ചകോടിക്ക് മുന്നോടിയായാണ് പ്രധാനമന്ത്രി യോഗങ്ങള്‍ നടത്തിയത്.
ഐസ്ലാന്‍ഡ് പ്രധാനമന്ത്രി ക്രിസ്റ്റണ്‍ ഫ്രോസ്റ്റാഡോട്ടിര്‍, ഫിന്‍ലാന്‍ഡ് പ്രധാനമന്ത്രി പെറ്റെറി ഓര്‍പോ, ഡെന്‍മാര്‍ക്ക് പ്രധാനമന്ത്രി മെറ്റ് ഫ്രെഡറിക്സെന്‍ എന്നിവരുമായി നടത്തിയ ചര്‍ച്ചയില്‍, ഭാരതവും മൂന്ന് നോര്‍ഡിക് രാജ്യങ്ങളും തമ്മിലുള്ള ഉഭയകക്ഷി ബന്ധത്തെക്കുറിച്ച് നരേന്ദ്ര മോദി ചര്‍ച്ച ചെയ്തു.
ഐസ്ലാന്‍ഡ് പ്രധാനമന്ത്രി ക്രിസ്റ്റണ്‍ ഫ്രോസ്റ്റാഡോട്ടിറുമായി ഒരു അത്ഭുതകരമായ കൂടിക്കാഴ്ച നടത്തി. ഐസ്ലാന്‍ഡുമായുള്ള സൗഹൃദത്തെ ഭാരതം വളരെയധികം വിലമതിക്കുന്നുവെന്ന് ഐസ്ലാന്‍ഡിക് പ്രധാനമന്ത്രിയുമായുള്ള കൂടിക്കാഴ്ചയ്‌ക്ക് ശേഷം മോദി എക്‌സില്‍ കുറിച്ചു. ശുദ്ധമായ ഊര്‍ജ്ജം, മത്സ്യബന്ധനം, സുസ്ഥിരത, ഭൂതാപ ഊര്‍ജ്ജം, സംഭരണം തുടങ്ങിയ മേഖലകളിലെ ബന്ധം മെച്ചപ്പെടുത്തുന്നതിനുള്ള വഴികള്‍ ചര്‍ച്ച ചെയ്തതായി അദ്ദേഹം പറഞ്ഞു.
