താഷ്‌കെന്റ്(ഉസ്ബെക്കിസ്ഥാന്‍): ഭാരതവും ഉസ്ബെക്കിസ്ഥാനും തന്ത്രപ്രധാന പങ്കാളിത്തത്തെ സമഗ്രതന്ത്രപ്രധാന പങ്കാളിത്തമായി ഉയര്‍ത്തുന്നു. ഭാരതത്തിന്റെ ആണവോര്‍ജ പദ്ധതികള്‍ക്ക് കരുത്തേകുന്ന നിര്‍ണായകമായ ദീര്‍ഘകാല യുറേനിയം വിതരണ കരാറില്‍ ഇരുരാജ്യങ്ങളും ഒപ്പുവെച്ചു. പ്രധാനമന്ത്രി നരേന്ദ്രമോദിയും ഉസ്ബെക്കിസ്ഥാന്‍ പ്രസിഡന്റ് ഷൗക്കത്ത് മിര്‍സിയോയേവും തമ്മില്‍ നടത്തിയ ഉഭയകക്ഷി ചര്‍ച്ചകള്‍ക്കുശേഷമാണ് ഈ പ്രഖ്യാപനം.
ഇരുരാജ്യങ്ങളും തമ്മില്‍ നടന്ന ചര്‍ച്ചകളിലെ ഏറ്റവും പ്രധാനപ്പെട്ട കാര്യങ്ങളിലൊന്ന് യുറേനിയം വിതരണ കരാറാണെന്ന് പ്രധാനമന്ത്രി നരേന്ദ്രമോദി അഭിപ്രായപ്പെട്ടു. ഇതിനുപുറമെ, നഗരങ്ങളും സംസ്ഥാനങ്ങളും തമ്മിലുള്ള പരസ്പര സഹകരണത്തിനായി മൂന്ന് സിസ്റ്റര്‍ സിറ്റി, ‘സിസ്റ്റര്‍ സ്റ്റേറ്റ് കരാറുകള്‍ക്കും ഇരുരാജ്യങ്ങളും രൂപം നല്‍കും. ഈ പങ്കാളിത്തം നടപ്പാക്കാന്‍ കൃത്യമായ കര്‍മ്മപദ്ധതി രൂപീകരിക്കണമെന്നും പ്രധാനമന്ത്രി നിര്‍ദ്ദേശിച്ചു.
ഭാരതത്തില്‍ നിന്നുള്ള യാത്രക്കാര്‍ക്കായി പുതിയ വിസ പ്രഖ്യാപനവും പ്രസിഡന്റ് ഷൗക്കത്ത് മിര്‍സിയോയേവ് നടത്തി. ഭാരത പൗരന്മാര്‍ക്ക് ഉസ്ബെക്കിസ്ഥാനില്‍ 30 ദിവസം വരെ തങ്ങുന്നതിന് ഇനി വിസ ആവശ്യമില്ലെന്ന് അദ്ദേഹം പ്രഖ്യാപിച്ചു. യാത്രകള്‍ കൂടുതല്‍ എളുപ്പമായിരിക്കുകയാണെന്നും ഇരുരാജ്യങ്ങളെയും ബന്ധിപ്പിച്ച് ഇപ്പോള്‍ ആഴ്ചയില്‍ 14 നേരിട്ടുള്ള വിമാനസര്‍വീസുകളുണ്ടെന്നും മിര്‍സിയോയേവ് കൂട്ടിച്ചേര്‍ത്തു. 2030 ഓടെ വ്യാപാരം അഞ്ച് ബില്യണ്‍ ഡോളറിലധികമായി വര്‍ദ്ധിപ്പിക്കാനും ഇരുരാജ്യങ്ങളും തമ്മിലുള്ള സഹകരണം ലക്ഷ്യമിടുന്നു. അടിസ്ഥാന സൗകര്യവികസനം, ഡിജിറ്റല്‍ പബ്ലിക് ഇന്‍ഫ്രാസ്ട്രക്ചര്‍, എഐ, നിര്‍ണായക ധാതുക്കള്‍, ഊര്‍ജ്ജം, ബഹിരാകാശം തുടങ്ങിയ മേഖലകളില്‍ സഹകരണം വര്‍ദ്ധിപ്പിക്കും. കൃഷി, ആരോഗ്യ സംരക്ഷണം എന്നീ മേഖലകളില്‍ സഹകരിച്ച് മുന്നോട്ടു പോകും. പരമ്പരാഗത ചികിത്സാ രീതികളിലെ പ്രവര്‍ത്തനങ്ങള്‍ വിപുലീകരിക്കുന്നിതിനായും ധാരണാപത്രത്തില്‍ ഒപ്പുവെച്ചു. വിദ്യാഭ്യാസ-സാംസ്‌കാരിക കൈമാറ്റ പരിപാടികള്‍ പ്രോത്സാഹിപ്പിക്കല്‍, ഉസ്ബെക്കിസ്ഥാനിലെ ബുദ്ധമത പൈതൃക കേന്ദ്രങ്ങള്‍ സംരക്ഷിക്കുന്നതിനായുള്ള സംയുക്ത പ്രവര്‍ത്തനങ്ങള്‍ എന്നിവയ്‌ക്കും ഇരുരാജ്യങ്ങളും തമ്മില്‍ ധാരണാപത്രത്തില്‍ ഒപ്പുവച്ചു.
ഭാരതത്തെ തങ്ങളുടെ വിശ്വസ്തതന്ത്രപ്രധാന പങ്കാളിയായാണ് കാണുന്നതെന്ന് പ്രസിഡന്റ് ഷൗക്കത്ത് മിര്‍സിയോയേവ് വ്യക്തമാക്കി. ഇരുരാജ്യങ്ങളും തമ്മിലുള്ള ഉഭയകക്ഷി വ്യാപാരം ചരിത്രത്തിലാദ്യമായി കഴിഞ്ഞവര്‍ഷം നൂറ് കോടി ഡോളര്‍ കടന്നതായി അദ്ദേഹം വ്യക്തമാക്കി. ഇരുരാജ്യങ്ങളും തമ്മിലുള്ള സംയുക്ത സംരംഭങ്ങളുടെ എണ്ണം ഏതാനും വര്‍ഷങ്ങള്‍ക്ക് മുന്‍പുള്ളതുമായി താരതമ്യം ചെയ്യുമ്പോള്‍ ഏഴിരട്ടി വര്‍ധനയുണ്ട്.
