പുതുച്ചേരിയുടെ രാഷ്ട്രീയ ചരിത്രത്തില് ജനകീയതയുടെ പര്യായമാണ് എന്. രംഗസ്വാമി. ഒരു സാധാരണ കോണ്ഗ്രസ് പ്രവര്ത്തകനായി രാഷ്ട്രീയ ജീവിതം ആരംഭിച്ച്, വളരെ വേഗത്തില് പാര്ട്ടിയുടെ നേതൃനിരയിലേക്കും പിന്നീട് ഭരണത്തലപ്പത്തേക്കും അദ്ദേഹം ഉയര്ന്നു. ലാളിത്യം നിറഞ്ഞ ജീവിതശൈലിയും മൃദുവായ സംസാരരീതിയും അദ്ദേഹത്തിന് ‘ജൂനിയര് കാമരാജ്’ എന്ന വിശേഷണം നേടിക്കൊടുത്തു. വിദ്യാഭ്യാസം, ദാരിദ്ര്യനിര്മ്മാര്ജ്ജനം, പൊതുജനക്ഷേമം എന്നീ മേഖലകളില് നടപ്പിലാക്കിയ വിപ്ലവകരമായ മാറ്റങ്ങള് ‘മക്കള് മുതല്വര്’ (ജനങ്ങളുടെ മുഖ്യമന്ത്രി) എന്ന പദവിയിലേക്ക് അദ്ദേഹത്തെ എത്തിച്ചു.
ഭരണനേട്ടങ്ങളും വികസന കാഴ്ചപ്പാടും
മുഖ്യമന്ത്രി എന്ന നിലയില് പുതുച്ചേരിയുടെ സമഗ്ര വികസനത്തിന് എന്. രംഗസ്വാമി വലിയ പ്രാധാന്യമാണ് നല്കിയത്. അടിസ്ഥാന സൗകര്യ വികസനത്തിലും പ്രാദേശിക ഭരണ പരിഷ്കാരങ്ങളിലും അദ്ദേഹം ശ്രദ്ധ കേന്ദ്രീകരിച്ചു. അദ്ദേഹത്തിന്റെ പ്രധാന ഭരണനേട്ടങ്ങളില് ചിലത് താഴെ പറയുന്നവയാണ്:
ഭവനനിര്മ്മാണം: ‘പെരുന്തലൈവര് കാമരാജര് ഭവനപദ്ധതി’യിലൂടെ വീട് നിര്മ്മാണത്തിന് സബ്സിഡി നല്കി പുതുച്ചേരിയെ കുടിലുകളില്ലാത്ത പ്രദേശമാക്കാന് അദ്ദേഹം മുന്കൈ എടുത്തു.
വിദ്യാഭ്യാസവും പോഷണവും: സര്ക്കാര് സ്കൂള് വിദ്യാര്ത്ഥികള്ക്ക് പ്രഭാതഭക്ഷണവും പാലും ഉറപ്പാക്കുന്ന ‘ശ്രീ രാജീവ് ഗാന്ധി പ്രഭാതഭക്ഷണ പദ്ധതി’, പ്രൊഫഷണല് കോളേജ് വിദ്യാര്ത്ഥികള്ക്കായുള്ള ‘കാമരാജ് വിദ്യാഭ്യാസ സഹായ പദ്ധതി’, സൗജന്യ പാഠപുസ്തക വിതരണം എന്നിവ വിദ്യാഭ്യാസ മേഖലയിലെ നാഴികക്കല്ലുകളാണ്.
സാമൂഹിക ക്ഷേമം: വയോജന പെന്ഷന് ഉള്പ്പെടെയുള്ള ക്ഷേമപദ്ധതികളിലൂടെ സമൂഹത്തിലെ പാര്ശ്വവല്ക്കരിക്കപ്പെട്ടവരുടെ ഉന്നമനത്തിനായി അദ്ദേഹം പ്രവര്ത്തിച്ചു.
ജീവിതരേഖയും രാഷ്ട്രീയ പ്രവേശനവും
നടേശന് കൃഷ്ണസ്വാമി ഗൗണ്ടര് രംഗസ്വാമി എന്നാണ് അദ്ദേഹത്തിന്റെ പൂര്ണ്ണനാമം. 1950 ഓഗസ്റ്റ് 4-ന് പുതുച്ചേരിയില് നടേശന് കൃഷ്ണസ്വാമിയുടെയും പാഞ്ചാലിയുടെയും മകനായി ജനിച്ചു. ടാഗോര് ആര്ട്സ് കോളജില് നിന്ന് കൊമേഴ്സ് ബിരുദവും, 1977-ല് പുതുച്ചേരി ഡോ. അംബേദ്കര് ഗവ. ലോ കോളജില് നിന്ന് നിയമബിരുദവും നേടി.
1990-ല് തട്ടഞ്ചാവടി മണ്ഡലത്തില് നിന്ന് കന്നിപ്പോരാട്ടത്തിന് ഇറങ്ങിയെങ്കിലും നേരിയ വോട്ടുകള്ക്ക് പരാജയപ്പെട്ടു. എന്നാല് തൊട്ടടുത്ത വര്ഷം (1991) നടന്ന തെരഞ്ഞെടുപ്പില് അതേ മണ്ഡലത്തില് നിന്ന് വന് ഭൂരിപക്ഷത്തോടെ വിജയിച്ച് അദ്ദേഹം നിയമസഭയിലെത്തി. 1996-ല് മന്ത്രിയായ അദ്ദേഹം വിദ്യാഭ്യാസം, പൊതുമരാമത്ത്, ടൂറിസം തുടങ്ങിയ സുപ്രധാന വകുപ്പുകള് കൈകാര്യം ചെയ്തു.
പ്രതിസന്ധികളും രാഷ്ട്രീയ അതിജീവനവും
2001 ഒക്ടോബറില് ആദ്യമായി മുഖ്യമന്ത്രിയായ അദ്ദേഹം 2006-ലും ആ പദവിയില് തുടര്ന്നു. എന്നാല് 2008-ല് പാര്ട്ടിക്കുള്ളിലെ ആഭ്യന്തര തര്ക്കങ്ങളെ തുടര്ന്ന് അദ്ദേഹത്തിന് രാജി വെക്കേണ്ടി വന്നു. സ്വന്തം മണ്ഡലത്തിന് മാത്രം മുന്തൂക്കം നല്കുന്നുവെന്ന സഹപ്രവര്ത്തകരുടെ ആരോപണമാണ് രാഷ്ട്രീയ പ്രതിസന്ധിക്ക് കാരണമായത്.
തിരിച്ചടികളില് തളരാതെ 2011 ഫെബ്രുവരി 7-ന് അദ്ദേഹം ഓള് ഇന്ത്യ എന്. ആര് കോണ്ഗ്രസ് (AINRC) രൂപീകരിച്ചു. പാര്ട്ടി രൂപീകരിച്ച് വെറും മൂന്ന് മാസത്തിനുള്ളില് നടന്ന തെരഞ്ഞെടുപ്പില് എഐഎഡിഎംകെയുമായുള്ള സഖ്യത്തോടെ അധികാരം പിടിച്ചെടുത്ത് എന്. രംഗസ്വാമി രാഷ്ട്രീയ ലോകത്തെ ഞെട്ടിച്ചു. തുടര്ന്ന് 2016-ല് പ്രതിപക്ഷ നേതാവായും അദ്ദേഹം തിളങ്ങി.
ചരിത്രപരമായ അഞ്ചാം ഊഴം
2021-ല് ബിജെപി ഉള്പ്പെട്ട എന്ഡിഎ സഖ്യത്തിലൂടെ നാലാം തവണയും മുഖ്യമന്ത്രിയായ രംഗസ്വാമി, ഭരണത്തുടര്ച്ചയുടെ കരുത്തുമായി 2026-ലും വിജയം ആവര്ത്തിച്ചു. 2026 മെയ് 13-ന് അഞ്ചാം തവണയും പുതുച്ചേരിയുടെ മുഖ്യമന്ത്രിയായി സത്യപ്രതിജ്ഞ ചെയ്ത് രംഗസ്വാമി അധികാരമേറ്റു.
പോണ്ടിച്ചേരിയുടെ അവസാന മുഖ്യമന്ത്രിയായും പുതുച്ചേരിയുടെ ആദ്യ മുഖ്യമന്ത്രിയായും സേവനമനുഷ്ഠിച്ച വ്യക്തിയെന്ന അപൂര്വ്വ ബഹുമതിയും എന്. രംഗസ്വാമിക്ക് സ്വന്തമാണ്. 2006 ഒക്ടോബര് 1-നാണ് കേന്ദ്രഭരണ പ്രദേശമായ പോണ്ടിച്ചേരിയുടെ പേര് ഔദ്യോഗികമായി ‘പുതുച്ചേരി’ എന്ന് മാറ്റിയത്. ഈ മാറ്റം നടക്കുമ്പോള് എന്. രംഗസാമി ആയിരുന്നു മുഖ്യമന്ത്രി പദവിയില് ഇരുന്നിരുന്നത്. 2001 ഒക്ടോബര് 27 മുതല് 2008 സെപ്റ്റംബര് 4 വരെയായിരുന്നു അദ്ദേഹത്തിന്റെ ആ കാലയളവിലെ മുഖ്യമന്ത്രി കാലാവധി. പേര് മാറ്റത്തിന് മുന്പും ശേഷവും അദ്ദേഹം തന്നെയായിരുന്നു ഭരണത്തലവന്. പ്രതിസന്ധികളെ അതിജീവനത്തിന്റെ പടവുകളാക്കി മാറ്റിയ അദ്ദേഹത്തിന്റെ രാഷ്ട്രീയ യാത്ര പുതുച്ചേരിയുടെ ചരിത്രത്തിലെ ഉജ്ജ്വലമായ അധ്യായമാണ്.
ജന്മഭൂമി ഓണ്ലൈന്