തിരുവനന്തപുരം: അധികാരമേറ്റാലുടന് സര്ക്കാര്, ശബരിമല സ്വര്ണക്കൊള്ളയില് സിബിഐ അന്വേഷണം പ്രഖ്യാപിക്കണമെന്നും ആചാര സംരക്ഷണ പ്രക്ഷോഭങ്ങളുടെ പേരിലെടുത്ത കേസുകള് പിന്വലിക്കണമെന്നും ബിജെപി ആവശ്യപ്പെട്ടു. എല്ലാവര്ക്കും തുല്യനീതി ഉറപ്പാക്കുക, ആരെയും പ്രീണിപ്പിക്കാതിരിക്കുക, വിവേചനമോ രാഷ്ട്രീയ പക്ഷഭേദമോ കാണിക്കാതിരിക്കുക, ക്ഷേത്ര സ്വത്തുക്കളുടെയും ആസ്തികളുടെയും ഓഡിറ്റ് ആരംഭിക്കുക എന്നിവയടക്കം 13 രാഷ്ട്രീയ അജണ്ടകളാണ് ബിജെപി സംസ്ഥാന നേതൃയോഗം മുന്നോട്ടുവച്ചതെന്ന് വാര്ത്താ സമ്മേളനത്തില് ബിജെപി സംസ്ഥാന ജനറല് സെക്രട്ടറി എം.ടി. രമേശ് പറഞ്ഞു.
അഴിമതി നീക്കണം. തകര്ന്ന, അമിത കടബാധ്യതയുള്ള സമ്പദ്വ്യവസ്ഥ ശരിയാക്കണം. ഗുണകരമായ, നീതിയുക്തവും സുതാര്യവും അഴിമതിയില്ലാത്തതുമായ ഭരണമാണെങ്കില് കേന്ദ്ര സര്ക്കാര് പിന്തുണ തേടാന് ഒപ്പം നില്ക്കും. ജനസംഖ്യ, സമുദായ, സാമ്പത്തിക അസമത്വങ്ങള് പരിഹരിക്കണം. ദരിദ്രര്ക്കും പിന്നാക്ക വിഭാഗങ്ങള്ക്കും അടിയന്തര സഹായം ലഭ്യമാക്കണം. വീടുകള്, ആരോഗ്യം, കുടിവെള്ളം തുടങ്ങിയ പ്രാഥമിക ആവശ്യങ്ങള് വേഗം പരിഹരിക്കണം. ഒബിസി സംവരണത്തിന്റെ മറവിലുള്ള മത സംവരണം പൂര്ണമായും റദ്ദാക്കണം. സംവരണ നയത്തില് എസ്സി, എസ്ടി, ഒബിസി, ഇഡബ്ല്യൂഎസ് എന്നിങ്ങനെ മാത്രമാക്കണം.
സ്വകാര്യ നിക്ഷേപങ്ങളിലൂടെ യുവാക്കള്ക്ക് തൊഴിലവസരങ്ങള് സൃഷ്ടിക്കണം. വിദ്യാഭ്യാസ മേഖലയില് കൂടുതല് നിക്ഷേപിക്കണം. കുട്ടികളെ മത മൗലികവാദ സംഘടനകളില് നിന്നും ഭീകര സംഘടനകളുടെയും ലഹരിയുടെയും സ്വാധീന വലയത്തില് നിന്നും സംരക്ഷിക്കണം.
കേന്ദ്രപദ്ധതികള് നടപ്പാക്കണം
പാവപ്പെട്ടവര്ക്ക് പ്രയോജനം ചെയ്യുന്ന കേന്ദ്ര പദ്ധതികള് നടപ്പാക്കണമെന്ന് ബിജെപി സംസ്ഥാന നേതൃയോഗം രാഷ്ട്രീയ പ്രമേയത്തില് ആവശ്യപ്പെട്ടു. പിഎംശ്രീ, ആയുഷ്മാന് ഭാരത്, പിഎം ആവാസ് അടക്കമുള്ള കേന്ദ്ര പദ്ധതികള് സാധാരണക്കാരുടെ വിദ്യാഭ്യാസ, ചികിത്സ, ഭവന ആവശ്യങ്ങള് മുന്നിര്ത്തിയുള്ളവയാണ്. നിയമസഭാ തെരഞ്ഞെടുപ്പില് ബിജെപിക്കുണ്ടായത് ചരിത്ര നേട്ടമാണെന്നും മൂന്ന് സീറ്റില് വിജയിച്ചത് ഇടതു വലതു മുന്നണികള്ക്ക് ബദലായി മൂന്നാം ശക്തിയായി ബിജെപി മാറിയതിന്റെ തെളിവാണെന്നും രാഷ്ട്രീയ പ്രമേയം വിശദീകരിക്കുന്നു.
