റോം: മികച്ച പോരാട്ടത്തിനൊടുവില് കോപ്പ ഇറ്റാലിയ ഫൈനലില് അര്ഹിച്ച വിജയവുമായി ഇന്റര് മിലാന് ജേതാക്കളായി. കലാശപ്പോരില് പൊരുതാനെത്തിയ ലാസിയോയെ 2-0ന് നിഷ്പ്രഭരാക്കിയാണ് ഇന്റര് നേട്ടം. ദിവസങ്ങള്ക്ക് മുമ്പ് ഈ ടീം ഇറ്റാലിയന് സീരി എ നേടിയിരുന്നു. 16 വര്ഷത്തിന് ശേഷമാണ് ഇറ്റലിയിലെ രണ്ട് ടൈറ്റിലുകളും ഇന്റര് ഒരുമിച്ച് ഒരേ സീസണില് നേടുന്നത്.
കലാശക്കളിയില് വ്യക്തമായ ആധിപത്യത്തോടെ കളിച്ച ഇന്റര് മത്സരത്തിന്റെ 14-ാം മിനിറ്റില് ഡെഡ്ലോക്ക് ബ്രേക്ക് ചെയ്തത് ദാനഗോള് ബലത്തിലാണ്. എന്നാല് ഇന്റര് ലാസിയോ ഗോള് മുഖത്ത് കാഴ്ച്ചവച്ച ശക്തമായ പ്രസിങ് ഗെയിമിനെ തുടര്ന്നായിരുന്നു ഈ ഗോള് നേട്ടം. ഇന്റര് തൊടുത്ത മികച്ചൊരു കോര്ണര് കിക്കിനെ ഹെഡ് ചെയ്ത് പുറത്തേക്ക് കളയാന് ശ്രമിച്ച ആദം മറൂസിച്ചിന് പിഴയ്ക്കുകയായിരുന്നു. പന്ത് സ്വന്തം വലയില് കയറിയതോടെ ഇന്റര് പട ആഘോഷം തുടങ്ങി.
35-ാം മിനിറ്റില് ടീം നായകന് കൂടിയായ ലൗത്താരോ മര്ട്ടിനെസിലൂടെയാണ് ഇന്റര് കിരീടം ഊട്ടി ഉറപ്പിക്കുന്നത്. മത്സരത്തില് ഇന്റര് നടത്തിയ നിരവധി മികച്ച മുന്നേറ്റങ്ങളില് ഒന്നായിരുന്നു അത്. മധ്യനിര താരം ഡെന്സല് ഡെംഫ്രീസ് നല്കിയ പാസിനെ ലൗത്താരോ തന്റെ സ്വതസിദ്ധമായ വഴക്കത്തിലൂടെ ഗോള് നേടുകയായിരുന്നു. ആദ്യ പകുതിയില് തന്നെ 2-0ന്റെ ആധിപത്യം പുലര്ത്തിയ ഇന്ററിന് പിന്നീട് കൂടുതല് അദ്ധ്വാനിക്കേണ്ടി വന്നില്ല. സ്വന്തം ഗോള് മുഖത്ത് കാര്യമായ വെല്ലുവിളിയുയര്ത്താനും എതിരാളികള്ക്ക് സാധിച്ചില്ല.
ഇന്റര് മിലാന്റെ പത്താം കോപ്പ ഇറ്റാലിയ കിരീടം ആണിത്. ഇതിന് മുമ്പ് ടൈറ്റില് സ്വന്തമാക്കിയത് 2023ലാണ്. ഏറ്റവും കൂടുതല് തവണ കോപ്പ ഇറ്റാലിയയില് മുത്തമിട്ടിട്ടുള്ളത് യുവെന്റസ് ആണ്. 15 കിരീടങ്ങള്.
