മുംബൈ: മഹാരാഷ്ട്രയിലെ സാംഗ്ലി ജില്ലയിലുണ്ടായ ശക്തമായ കാറ്റിൽ ക്ഷേത്രമതിൽ തകർന്ന് വീണ് ആറ് മരണം. മരിച്ചവരിൽ കുട്ടികളും ഉൾപ്പെടുന്നു. ഇന്നലെ വൈകിട്ടോടെയായിരുന്നു അപകടം. ദർശനത്തിനെത്തിയ ഭക്തരുടെ മേലേക്ക് പഴക്കം ചെന്ന മതിൽ ഇടിഞ്ഞു വീഴുകയായിരുന്നു.
അപകടസ്ഥലത്ത് വെച്ചും ആശുപത്രിയിലേക്കുള്ള വഴിമധ്യേയുമാണ് കുട്ടികളടക്കം ആറ് പേർ ജീവശ്വാസം വെടിഞ്ഞത്. വിവരമറിഞ്ഞ് പോലീസും പ്രാദേശിക ഭരണകൂടവും സ്ഥലത്തെത്തി രക്ഷാപ്രവർത്തനം ആരംഭിച്ചു. പരിക്കേറ്റവരെ അടുത്തുള്ള ആശുപത്രികളിൽ പ്രവേശിപ്പിച്ചു.
പഴയ മതിലിന്റെ ബലക്ഷയമാണ് അപകടത്തിന് കാരണമായതെന്നാണ് പ്രാഥമിക നിഗമനം. പോലീസ് അന്വേഷണം ആരംഭിച്ചിട്ടുണ്ട്. മരിച്ചവരുടെ കുടുംബങ്ങൾക്ക് സർക്കാർ ധനസഹായം പ്രഖ്യാപിക്കുമെന്നാണ് വിവരം. ദുരന്തത്തിൽ പ്രധാനമന്ത്രി നരേന്ദ്ര മോദി അനുശോചനം രേഖപ്പെടുത്തി. മരിച്ചവരുടെ കുടുംബാംഗങ്ങൾക്കൊപ്പമാണ് താനെന്ന് അദ്ദേഹം എക്സിൽ കുറിച്ചു.
