തിരുവനന്തപുരം:തലസ്ഥാന നഗരത്തിലെ മാനവീയം വീഥിയില് യുവാവിനെ മാരകായുധം കൊണ്ട് ആക്രമിച്ച സംഭവത്തില് രണ്ട് യുവാക്കള് അറസ്റ്റിലായി.ബാലരാമപുരം സ്വദേശികളായ കാശിനാഥന് (22), ഉണ്ണികൃഷ്ണന് (23) എന്നിവരെയാണ് മ്യൂസിയം പൊലീസ് അറസ്റ്റ് ചെയ്തത്.
ഞായറാഴ്ച രാത്രി ഒമ്പതോടെയാണ് കേസിനാധാരമായ സംഭവം നടന്നത്. ജോലി കഴിഞ്ഞ് സുഹൃത്തുക്കളോടൊപ്പം ചായ കുടിച്ചുനിന്ന മലയിന്കീഴ് സ്വദേശി യുവാവിനെ പ്രതികള് അനാവശ്യമായി അസഭ്യം പറഞ്ഞു. ഇത് ചോദ്യം ചെയ്തതിലുള്ള വൈരാഗ്യമാണ് ആക്രമണ കാരണം.
മാരകായുധം കൊണ്ടുള്ള ആക്രമണത്തില് യുവാവിന്റെ മുഖത്ത് ഗുരുതരപരിക്കേറ്റു. തടയാന് ശ്രമിച്ച സുഹൃത്തുക്കളെയും പ്രതികള് മര്ദിച്ചു. പരിക്കേറ്റ യുവാവ് നിലവില് ആശുപത്രിയിലാണ്.
അറസ്റ്റിലായ പ്രതികളില് ഒരാളായ കാശിനാഥനെതിരെ തിരുവനന്തപുരം റൂറല് പരിധിയിലെ ബാലരാമപുരം സ്റ്റേഷനില് മൂന്ന് വധശ്രമക്കേസുകള് നിലവിലുണ്ട്. അറസ്റ്റ് ചെയ്ത പ്രതികളെ കോടതിയില് ഹാജരാക്കി റിമാന്ഡ് ചെയ്തു.
