തിരുവല്ല : ഒഴുക്കില്പ്പെട്ട വീട്ടമ്മയ്ക്ക് രക്ഷകനായി അഗ്നിശമന സേന ഉദ്യോഗസ്ഥന്. ചെങ്ങന്നൂര് പാണ്ടനാട് സ്വദേശി ശ്രീകല എന്ന 50 കാരിക്കാണ് തിരുവല്ല അഗ്നി രക്ഷാ നിലയത്തിലെ ഗ്രേഡ് അസിസ്റ്റന്റ് സ്റ്റേഷന് ഓഫീസറും തിരുവല്ല മലയിത്ര സ്വദേശിയുമായ കെ കെ ശ്രീനിവാസ് രക്ഷകന് ആയത്.
കുടുംബവുമൊത്ത് ഉല്ലാസയാത്ര കഴിഞ്ഞ് കാറില് മടങ്ങി വരവേ ഒരു കൂട്ടം ആളുകള് പാലത്തില് നില്ക്കുന്നത് ശ്രീനിവാസിന്റെ ശ്രദ്ധയില്പ്പെട്ടു. തുടര്ന്ന് കാര് നിര്ത്തി. അപ്പോഴാണ് പാലത്തിന് 50 മീറ്ററോളം മാറി നദിയുടെ മധ്യത്തിലെ മണല് പുറ്റില് തങ്ങി നില്ക്കുന്ന സ്ത്രീകളെ കണ്ടത്. വടം ഉപയോഗിച്ച് രക്ഷിക്കാന് ശ്രമിച്ചെങ്കിലും സാധിച്ചില്ല. തുടര്ന്ന് നദിയിലെ കുത്തൊഴു ക്കില് മറ്റൊരാള് എറിഞ്ഞു നല്കിയ വടവുമായി 100 മീറ്ററോളം നീന്തി ശ്രീനിവാസ് ശ്രീകലയുടെ അടുത്തെത്തി. വടം ശ്രീകലയുടെ അരയി ല് ബന്ധിച്ച ശേഷം അതി സാഹസികമായി തിരികെ നീന്തി രക്ഷപ്പെടുത്തുകയായിരുന്നു.
ധീര പ്രവര്ത്തിയിലൂടെ ഒരു ജീവന് രക്ഷപ്പെടുത്തിയ ശ്രീനിവാസിനെ തിരുവല്ല അഗ്നി രക്ഷാ നിലയത്തിലെ സഹപ്രവര്ത്തകര് ചേര്ന്ന് പൊന്നാട അണിയിച്ച് ആദരിച്ചു. വീട്ടമ്മ പമ്പയാറ്റിലെ കടവില് തുണി കഴുകുന്നതിനിടെ നദിയിലെ ഒഴുക്കില് പെടുകയായിരുന്നു. പാണ്ടനാട് മിത്രക്കടവ് പാലത്തിന് സമീപം ഞായറാഴ്ച വൈകിട്ട് 4 മണിയോടെ ആയിരുന്നു സംഭവം.
