കോഴിക്കോട്: രാമനാട്ടുകര മുട്ടിയറയിൽ പുഴയിൽ വിഷം കലക്കി മീൻപിടിക്കാൻ ശ്രമം. ചാലിയാറിന്റെ കൈവഴിയിലാണ് വിഷം കലക്കിയത്. സംശയം തോന്നി നാട്ടുകാർ ഓടിയെത്തിയതോടെ സംഘം രക്ഷപ്പെടുകയും, പ്രതികളുടെ വാഹനവും വലയും പോലീസ് പിടിച്ചെടുക്കുകയും ചെയ്തു.
നിരവധി മീനുകൾ ചത്തുപൊങ്ങിയെന്നാണ് റിപ്പോർട്ട്. സംഘത്തെ സഹായിക്കാനെത്തിയ ഒരാളെ കസ്റ്റഡിയിലെടുത്തിട്ടുണ്ടെന്നാണ് വിവരം. സംഭവത്തിൽ അന്വേഷണം ആരംഭിച്ചു. കേരളത്തിലെ ഏറ്റവും നീളം കൂടിയ നദികളിൽ നാലാം സ്ഥാനത്തുള്ള നദിയാണ് ചാലിയാർ. 169 കിലോമീറ്റർ നീളമുള്ള ഈ നദി തമിഴ്‌നാട്ടിലെ നീലഗിരി മലനിരകളിലെ ഇളമ്പലേരി കുന്നുകളിൽ നിന്ന് ഉത്ഭവിച്ച്, മലപ്പുറം, കോഴിക്കോട് ജില്ലകളിലൂടെ ഒഴുകി ബേപ്പൂരിൽ വെച്ച് അറബിക്കടലിൽ പതിക്കുന്നു.
കേരളത്തിൽ സ്വർണ്ണ നിക്ഷേപം കണ്ടെത്തിയിട്ടുള്ള നദീതീരം കൂടിയാണിത്.
