ബെംഗളൂരു: എംആര്ഐ സ്കാനിംഗ് ചെലവ് 70 ശതമാനത്തോളം കുറയ്ക്കുന്ന, എന്നാല് കൃത്യമായി റിസള്ട്ട് ലഭിക്കുന്ന സ്കാനിംഗ് യന്ത്രം വികസിപ്പിച്ച് ബെംഗളൂരു കേന്ദ്രമായി പ്രവര്ത്തിക്കുന്ന വോക്സല് ഗ്രിഡ്. ഈ സ്റ്റാര്ട്ടപ്പ് കമ്പനിക്ക് വേണ്ട ധനസഹായം സോഹോ ഉടമ ശ്രീധര് വെമ്പുവും ടാറ്റാ ട്രസ്റ്റും ചേര്ന്ന് നല്കിയതിനാല് ഈ സ്കാനിംഗ് യന്ത്രത്തിന്റെ ഗുണംഇന്ത്യക്കാര്ക്ക് ലഭിക്കുമെന്ന് സിഇഒ അര്ജുന് അരുണാചലം പറയുന്നു.
മാഗ്നറ്റിക് റെസൊണന്സ് ഇമേജിംഗ് അഥവാ എംആര്ഐ രംഗം കീഴടക്കിയിരിക്കുന്നത് ഏതാനും വിദേശക്കമ്പനികളാണ്. അവര്ക്കിടയിലേക്ക് അവരുടെ ആധിപത്യം വെല്ലുവിളിച്ച് കൊണ്ട് ഇന്ത്യയുടെ സ്റ്റാര്ട്ടപ് കമ്പനിയായ വോക്സല് ഗ്രിഡ് എന്ന കമ്പനി കടന്നുവരികയാണ്. പുതിയ പരീക്ഷണങ്ങളുമായി ഈ രംഗത്തേക്ക് കടന്നുവരുന്ന ചെറിയ കമ്പനികളെ വിഴുങ്ങി തങ്ങളുടെ ആധിപത്യം നിലനിര്ത്തിവരികയായിരുന്നു അമേരിക്കന്, യൂറോപ്യന് കമ്പനികള്.
ആ രംഗത്തേക്ക് എംആര്ഐ സ്കാനിംഗ് ഇപ്പോഴുള്ളതിന്റെ 70 ശതമാനത്തോളം കുറയ്ക്കുന്ന പരീക്ഷണവുമായാണ് പുതിയ കമ്പനി എത്തുന്നത്. ശ്രീധര് വെമ്പുവും ടാറ്റയും ഈ സ്റ്റാര്ട്ടപ്പിനെ തുടക്കം മുതല് സഹായിക്കുന്നതിനാല് ഇനി വിദേശ കമ്പനികളെ വിഴുങ്ങാനാവില്ല.
