മുംബൈ:ജെൻസീയും ജെന് ആല്ഫയിലും പെട്ട വിദ്യാര്ത്ഥികള് പറയുന്ന വാക്കുകള് ശ്രദ്ധാപൂര്വ്വം കേട്ടും അവരോട് ചില കാര്യങ്ങള് തുറന്നുപറഞ്ഞും ആര്എസ്എസ് മേധാവി മോഹന് ഭാഗവത് സംസാരിച്ചപ്പോള് പുതിയ തലമുറയ്ക്ക് അത് പുതിയ അനുഭവം. ജെൻസീ ജെന് ആല്ഫ വിഭാഗത്തില്പ്പെടുന്ന വിദ്യാര്ത്ഥിവിഭാഗത്തിലെ ഇളം തലമുറയില്പ്പെട്ട 2000 പേരോടാണ് മോഹന് ഭാഗവത് സംസാരിച്ചത്.
കോക്രോച്ച് ജനതാ പാര്ട്ടി ജന്തര് മന്തറില് നടത്തിയ പ്രക്ഷോഭത്തിന് തൊട്ടുപിന്നാലെ നടന്ന സംവാദമായതിനാല് ഇതിനേക്കാള് പ്രസക്തമായ സമയം വേറെയില്ല. മോഹന് ഭാഗവതിന്റെ ശരീരഭാഷ, പ്രതികരണങ്ങള്, ഭാഷ ഇതെല്ലാം മിതത്വം പുലര്ത്തുന്ന ഒന്നായതിനാല് അത് ജെന്സീ തലമുറയ്ക്ക് അത്രമേല് സ്വീകാര്യവുമായി.
മുംബൈയിലെ നിത മുകേഷ് അംബാനി കള്ച്ചറല് സെന്ററിലായിരുന്നു ഈ സംവാദപരിപാടിയിലൂടെ രണ്ട് തലമുറകള് തമ്മിലുള്ള വിടവ് നികത്തുകയായിരുന്നു മോഹന് ഭാഗവത്. വാസ്തവത്തില് മോഹന് ഭാഗവത് ഈ തലമുറയെ കേള്ക്കുകയായിരുന്നു എന്ന് പറയുന്നതാവും ശരി. അവരുടെ രാജ്യസ്നേഹത്തെ ചോദ്യം ചെയ്യാതെ, അവരെ അദ്ദേഹം കേട്ടിരുന്നത് ജെന്സീക്കും ഹൃദ്യമായ അനുഭവമായി.
സാധാരണ ഇംഗ്ലീഷില് അധികം സംസാരിക്കാത്ത മോഹന് ഭാഗവത് ജെന്സീ, ജെന് ആള്ഫയുടെ ഭാഷയായ ഇംഗ്ലീഷ് തന്നെ ആശയവിനിമയത്തിന് തെരഞ്ഞെടുത്തു. പ്രതിഷേധിക്കുന്ന യുവാക്കളെ രാജ്യദ്രോഹികളാക്കുന്നതിനോട് തനിക്ക് യോജിപ്പില്ലെന്നും അദ്ദേഹം പറഞ്ഞു. അദ്ദേഹം തൊഴിലില്ലായ്മ, സംവരണം, തൊഴില് മാന്യത, വിദ്യാഭ്യാസം എന്നിവയെക്കുറിച്ച് സംസാരിച്ചു. പുതിയ ജെന്സീ, ജെന് ആല്ഫ തലമുറയുടെ ഒരു സ്വഭാവത്തെക്കുറിച്ച് അദ്ദേഹം ഇങ്ങിനെ പറഞ്ഞു:”അവര് ചോദ്യങ്ങള് ചോദിക്കുന്നവരാണ്. അതുപോലെ ആ ചോദ്യത്തിന് യുക്തിയുക്തമായ മറുപടിയും അവര് ആഗ്രഹിക്കുന്നു.”
“ജെന് സീ സമരം ചെയ്യുമ്പോള് ആ സമരമെല്ലാം ദേശവിരുദ്ധമാകില്ല. അവരെ കേള്ക്കണം. കേള്ക്കുക മാത്രമല്ല, അവരെ കേട്ടെന്ന് അവരെ ബോധ്യപ്പെടുത്തുകയും വേണം.”- മോഹന് ഭാഗവത് പറയുന്നു.
സമരവും ഒരു തരം സംവാദമാണെന്ന് പറഞ്ഞ അദ്ദേഹം പക്ഷെ സമരക്കാര്ക്ക് മുന്നില് ഒരു കാര്യം വ്യക്തമാക്കി. “സമരം ചെയ്യുന്നത് പരസ്പര വിശ്വാസം കെട്ടിപ്പടുക്കാനായിരിക്കണം, അതല്ലാതെ വിഭജനത്തിനും വിഭാഗീയതക്കും വേണ്ടിയാകരുത്. “- അദ്ദേഹം അടിവരയിട്ട് ജെന്സീയെ ഓര്മ്മിപ്പിച്ചു.
തലമുറമാറ്റത്തെക്കുറിച്ച് അദ്ദേഹം സൂചിപ്പിച്ചു:”ഞങ്ങളുടെ കാലത്ത് അനുസരണയ്ക്കായിരുന്നു പ്രാധാന്യം. പുതിയ തലമുറ ചോദ്യങ്ങള് ചോദിക്കും. നമ്മള് അതിന് യുക്തിഭദ്രമായ ഉത്തരം നല്കണം. ചര്ച്ചയാണ് അടിച്ചേല്പ്പിക്കലല്ല വേണ്ടത്.”- മോഹന് ഭാഗവത് ഇത് പറഞ്ഞപ്പോള് ജെന്സീയ്ക്കും അത് നൂറ് ശതമാനവും സ്വീകാര്യം.
