ന്യൂദല്‍ഹി: നിയമസഭാ തെരഞ്ഞെടുപ്പില്‍ കേരളത്തില്‍ ബിജെപി മൂന്ന് സീറ്റുകള്‍ നേടിയത് ഗൗരവമുള്ള കാര്യമെന്ന് സിപിഎം പോളിറ്റ് ബ്യൂറോയുടെ വിലയിരുത്തല്‍. സിപിഎമ്മിന് സംസ്ഥാനത്തുണ്ടായത് ഞെട്ടിച്ച തോല്‍വിയാണെന്നും യോഗം വിലയിരുത്തി.
ഇടതുപക്ഷത്തിനുണ്ടായ അപ്രതീക്ഷിത തിരിച്ചടിയെ അതീവ ഗൗരവതരമായി കാണുന്നുവെന്ന് വാര്‍ത്താസമ്മേളനത്തില്‍ യോഗതീരുമാനങ്ങള്‍ വിശദീകരിച്ച സിപിഎം ജനറല്‍ സെക്രട്ടറി എം.എ. ബേബി പറഞ്ഞു. തിരിച്ചടിയുടെ കാരണങ്ങള്‍ പാര്‍ട്ടി പരിശോധിക്കും ആവശ്യമായ തിരുത്തലുകള്‍ വരുത്തും. തിരുത്തി മുന്നോട്ടു പോകും. സംസ്ഥാന സെക്രട്ടറിയേറ്റ് യോഗം തോല്‍വിയുടെ കാരണങ്ങള്‍ വിശദമായി ചര്‍ച്ച ചെയ്യുമെന്നും അദ്ദേഹം അറിയിച്ചു.
തോല്‍വിയുടെ ഉത്തരവാദിത്വം പിണറായി വിജയന് ഏറ്റെടുക്കേണ്ടതില്ല, തെരഞ്ഞെടുപ്പിനെ നേരിട്ടത് ഒറ്റക്കെട്ടായാണ്. മുഖ്യമന്ത്രി എന്ന നിലയിലാണ് അദ്ദേഹത്തെ ഉയര്‍ത്തിക്കാട്ടിയതെന്നും എം.എ. ബേബി പറഞ്ഞു. പിണറായി വിജയന് പ്രതിപക്ഷ നേതാവ് ആകണമോ എന്നതിനെക്കുറിച്ച് പിബി ചര്‍ച്ച ചെയ്തില്ലെന്നും സംസ്ഥാന സെക്രട്ടറിയേറ്റ് ചര്‍ച്ച ചെയ്ത് തീരുമാനമെടുക്കുമെന്നും അദ്ദേഹം പറഞ്ഞു.
പശ്ചിമബംഗാളില്‍ തൃണമൂല്‍ കോണ്‍ഗ്രസ് പരാജയപ്പെട്ടത് ഭരണവിരുദ്ധ വികാരം കൊണ്ടാണെന്ന് എം.എ. ബേബി പറഞ്ഞു. ഡിഎംകെയുമായി ചര്‍ച്ച ചെയ്ത ശേഷമാണ് തമിഴ്നാട്ടില്‍ ടിവികെ സര്‍ക്കാരിനെ പിന്തുണച്ചതെന്നും അദ്ദേഹം കൂട്ടിച്ചേര്‍ത്തു.
കേരളത്തിലെ പരമ്പരാഗത ഇടത് വോട്ടുകളില്‍ ചോര്‍ച്ചയുണ്ടായെന്ന് സിപിഐ ദേശീയ കൗണ്‍സില്‍ യോഗം വിലയിരുത്തി. വോട്ട് ചോര്‍ച്ച ആശങ്കാജനകമാണെന്നും വിശദമായ പരിശോധന വേണമെന്നുമാണ് സിപിഐ നിലപാട്.
