ചെന്നൈ: തമിഴക വെട്രി കഴകം അധ്യക്ഷൻ വിജയ് തമിഴ്നാട് മുഖ്യമന്ത്രിയായി സത്യപ്രതിജ്ഞ ചെയ്ത് അധികാരമേറ്റതിന് പിന്നാലെ ആശംസകൾ നേർന്ന പ്രധാനമന്ത്രി നരേന്ദ്ര മോഡി. തമിഴ്നാട്ടിലെ ജനങ്ങളുടെ ക്ഷേമത്തിനായി കേന്ദ്രം സംസ്ഥാന സർക്കാരുമായി സഹകരിച്ച് പ്രവർത്തിക്കുമെന്ന് എക്സ് പോസ്റ്റിലൂടെ വ്യക്തമാക്കി. ആശംസകൾക്കൊപ്പം തന്നെ കോൺഗ്രസിനെതിരെ കടുത്ത രാഷ്ട്രീയ വിമർശനവും പ്രധാനമന്ത്രി ഉന്നയിച്ചു. കഴിഞ്ഞ 30 വർഷത്തോളം ഡിഎംകെയുമായി സഹകരിച്ച കോൺഗ്രസ് ഇപ്പോൾ സ്വാർത്ഥ താല്പര്യങ്ങൾക്കായി മുന്നണി മാറിയെന്ന് അദ്ദേഹം കുറ്റപ്പെടുത്തി.
അധികാരമുള്ളപ്പോൾ ഡിഎംകെയെ പിന്തുണച്ച കോൺഗ്രസ് ഇപ്പോൾ ടിവികെ പാളയത്തിലേക്ക് മാറിയത് രാഷ്ട്രീയ നിലനിൽപ്പിന് വേണ്ടിയാണെന്നും അധികാരത്തിന് വേണ്ടി കോൺഗ്രസ് എന്തും ചെയ്യുമെന്നും മോഡി പരിഹസിച്ചു. ദീർഘകാലം ഒപ്പം നിന്ന ഡിഎംകെയെ വഞ്ചിച്ചതിലൂടെ കോൺഗ്രസ് വിശ്വസിക്കാൻ കൊള്ളാത്ത പാർട്ടിയാണെന്ന് തെളിയിച്ചിരിക്കുകയാണെന്നും പ്രധാനമന്ത്രി കൂട്ടിച്ചേർത്തു.
