കോഴിക്കോട്: കഥാകൃത്ത് ടി.പദ്മനാഭന് അവസരവാദിയാണെന്ന് ആക്ഷേപിച്ച് എം.എന്.കാരശ്ശേരി. തന്റെ സാമൂഹ്യ മാധ്യമത്തിലൂടെയാണ് കഥാകാരനെ കാരശ്ശേരി ആക്ഷേപിച്ചത്. മുഖ്യമന്ത്രി സ്ഥാനത്തേക്ക് കെ.സി. വേണുഗോപാലിനെ പരിഗണിക്കണമെന്ന പദ്മനാഭന്റെ പ്രതികരണമാണ് കാരശ്ശേരിയെ ചൊടിപ്പിച്ചത്.
പദ്മനാഭന് വിശ്വാസ്യതയില്ലെന്നും പണക്കാരേയും അധികാരത്തേയും പുകഴ്ത്തുന്ന ശീലമാണ് പദ്മനാഭനുള്ളതെന്നും അദ്ദേഹം പറഞ്ഞു. സാഹിത്യകാരന് പത്മനാഭനോട് വലിയ ബഹുമാനമാണെങ്കിലും ബഹുമാനമുണ്ടെന്ന കാരണത്താല് വിമര്ശിക്കാന് പാടില്ലെന്നില്ല. വിമര്ശിച്ചുവെന്നതിനാല് ബഹുമാനമില്ലെന്ന് അര്ത്ഥമില്ലെന്നും കാരശ്ശേരി പറയുന്നു. മരിച്ചാല് പുതപ്പിക്കേണ്ടത് കോണ്ഗ്രസിന്റെ പതാകയാണെന്ന് പറയുന്ന ടി. പദ്മനാഭന്റെ രാഷ്ട്രീയം നിര്ഭാഗ്യവശാല് അവസരവാദപരമാണ്. 2016ല് സിപിഎം നേതാവ് പിണറായി വിജയന് ആദ്യമായി മുഖ്യമന്ത്രിയായി സത്യപ്രതിജ്ഞ ചെയ്യുന്ന രാവിലെ മാതൃഭൂമി ദിനപത്രത്തിന്റെ എഡിറ്റ് പേജില് അദ്ദേഹത്തെ വാനോളം പുകഴ്ത്തി ലേഖനം എഴുതിയ ആളാണ് പദ്മനാഭന്. കൊലക്കേസ് പ്രതിയായിരിക്കെ തെരഞ്ഞെടുപ്പില് മത്സരിച്ച കാരായി രാജന് കെട്ടിവെക്കാനുള്ള തുക പദ്മനാഭന് നല്കി, കാരശ്ശേരിയുടെ പദ്മനാഭനെതിരായ കുറ്റപത്രം തുടരുന്നു. സിപിഎമ്മിന്റെ സ്ഥാനാര്ത്ഥിയായി മത്സരിച്ച നടന് മുരളിക്ക് കെട്ടിവെക്കാനുളള തുക നല്കിയതും കാരശ്ശേരി ഓര്മ്മിപ്പിക്കുന്നു. അവനവന് അംഗീകാരവും ആദരവും കിട്ടുമോ എന്ന് നോക്കിയിട്ടാണ് പദ്മനാഭന് സൗജന്യങ്ങള് നല്കുന്നതെന്ന് കാരശ്ശേരി ആക്ഷേപിക്കുന്നു.
പദ്മനാഭന്റെ അവസരവാദപരമായ നിലപാട് മലയാളികള്ക്ക് ഓര്മയുണ്ടെന്നും അതിന് യാതൊരുതര വിശ്വാസ്യതയും ഇല്ലെന്നും ജീവിതകാലം മുഴുവന് എം.ടി.വാസുദേവന് നായരെ വിമര്ശിച്ച ഒരാളാണ് ടി. പദ്മനാഭനെന്നും കാരശ്ശേരി പറയുന്നു.
