തിരുവനന്തപുരം: കേരളത്തില്‍ 2026ല്‍ നടന്ന നിയമസഭാ തെരഞ്ഞെടുപ്പില്‍ ഏറ്റവും കൂടുതല്‍ നേട്ടം കൊയ്തത് ക്രിസ്ത്യന്‍ സമുദായമാണെന്ന് മുന്‍ ഡിജിപി ഡോ. ടി.പി. സെന്‍കുമാര്‍. ഒരു ടെലിവിഷന്‍ ചാനല്‍ ചര്‍ച്ചയില്‍ പങ്കെടുത്ത് സംസാരിക്കുകയായിരുന്നു അദ്ദേഹം.
കേരളത്തിലെ വിവിധ മതസമുദായങ്ങള്‍ക്ക് 2026ലെ നിയമസഭാ തെരഞ്ഞെടുപ്പിലെ നേട്ടങ്ങള്‍ പരിശോധിച്ചാല്‍ ഏറ്റവുമധികം നേട്ടങ്ങള്‍ ലഭിച്ചത് ക്രിസ്ത്യന്‍ സമുദായത്തിനാണ്. 18 ശതമാനം ജനസംഖ്യയുള്ള ക്രിസ്ത്യന്‍ സമുദായത്തില്‍ നിന്നും ഇക്കുറി 36 എംഎല്‍എമാര്‍ ഉണ്ടായി. ആകെയുള്ള 140 അംഗ നിയമസഭയിലാണ് ഇതെന്നോര്‍ക്കണം. -ഡോ. ടി.പി. സെന്‍കുമാര്‍ പറയുന്നു.
ഇനി മുന്നണി തലത്തില്‍ പരിശോധിച്ചാല്‍ യുഡിഎഫില്‍ 31 ക്രിസ്ത്യന്‍ എംഎല്‍എമാരുണ്ട്. മറ്റു മതസമുദായങ്ങളുടെ എണ്ണവും അവരില്‍ നിന്നുള്ള എംഎല്‍എമാരുടെയും കണക്കെടുത്താല്‍ ക്രിസ്ത്യന്‍ സമുദായത്തിന് 15 ശതമാനത്തിലധികം നേട്ടമാണ് കൂടുതലായി കിട്ടിയത്. ഇതില്‍ ഒരു സംശയം ബാക്കിനില്‍ക്കുന്നു. അതായത് വെറും 18 ശതമാനം ക്രിസ്ത്യന്‍ സമുദായമേ കേരളത്തില്‍ ഉള്ളൂ എന്ന് അവകാശപ്പെടുന്നതില്‍ സത്യമുണ്ടോ എന്ന് പരിശോധിക്കണം. കാരണം കേരളത്തിലെ ക്രിസ്ത്യാനികളില്‍ ക്രിപ്റ്റോകള്‍ ഉണ്ടോ എന്ന് പരിശോധിക്കണം. എന്താണ് ക്രിപ്റ്റോ ക്രിസ്ത്യാനികള്‍? ജനനരജിസ്റ്ററിലൊക്കെ ഹിന്ദുപേരും ഹിന്ദുസമുദായാംഗവും ആയിരിക്കും. പക്ഷെ ഇവര്‍ യഥാര്‍ത്ഥത്തില്‍ അനുസരിക്കുന്ന ബിഷപ്പുമാരെയാണ്. ഇത്തരം ക്രിപ്റ്റോ ക്രിസ്ത്യാനികള്‍ കേരളത്തില്‍ എത്ര പേരുണ്ടെന്ന് പരിശോധിക്കേണ്ടതുണ്ട്. – ഡോ.ടി.പി. സെന്‍കുമാര്‍ പറയുന്നു.
