കൊച്ചി: ഇന്ത്യൻ ക്രിക്കറ്റ് ഇതിഹാസം യുവരാജ് സിങ്ങും മലയാളികളുടെ പ്രിയനടി നവ്യ നായരും തൃശ്ശൂരിൽ ഒന്നിച്ചെത്തിയത് ആരാധകർക്ക് ആവേശമായി. ധനലക്ഷ്മി ഗ്രൂപ്പിന്റെ കോർപ്പറേറ്റ് ഓഫീസ് സന്ദർശിക്കാനെത്തിയപ്പോഴാണ് നവ്യ നായരും ചടങ്ങിൽ അതിഥിയായി പങ്കുചേർന്നത്.
യുവരാജിനൊപ്പമുള്ള ചിത്രം സോഷ്യൽ മീഡിയയിൽ പങ്കുവെച്ചുകൊണ്ട് നവ്യ കുറിച്ച വാക്കുകൾ ഇപ്പോൾ ശ്രദ്ധനേടുകയാണ്.
‘ഒരു തലമുറയെ മുഴുവൻ പ്രചോദിപ്പിച്ച വ്യക്തിത്വത്തോടൊപ്പം വേദി പങ്കിടുന്നു’ -എന്ന് നവ്യ നായർ തന്റെ പോസ്റ്റിൽ കുറിച്ചു.
ഇന്ത്യൻ ക്രിക്കറ്റ് ഇതിഹാസം യുവരാജ് സിങ്ങും മലയാളികളുടെ പ്രിയനടി നവ്യ നായരും തൃശ്ശൂരിൽ ഒന്നിച്ചെത്തിയത് ആരാധകർക്കും ആവേശമായി.
ചടങ്ങിനിടെ തന്റെ മകൻ സായി കൃഷ്ണയ്‌ക്ക് വേണ്ടി യുവരാജ് സിങ്ങിന്റെ കൈയൊപ്പ് പതിപ്പിച്ച ബാറ്റ് സ്വന്തമാക്കിയ താരം, മകന് നൽകാൻ ഇതിലും മികച്ചൊരു സമ്മാനം വേറെയില്ലെന്നും കൂട്ടിച്ചേർത്തു.
ചടങ്ങിൽ വെച്ച് ക്രിക്കറ്റിനെക്കുറിച്ചും യുവരാജിന്റെ ഐതിഹാസിക പ്രകടനങ്ങളെക്കുറിച്ചും നവ്യ സംസാരിക്കുകയുണ്ടായി. താൻ മകനോട് എപ്പോഴും പറയുന്ന ഒരു കാര്യത്തെക്കുറിച്ച് നവ്യ വേദിയിൽ വെച്ച് യുവരാജിനോട് പങ്കുവെച്ചു.
“ക്രിക്കറ്റുമായി ബന്ധപ്പെട്ട് ഞാൻ മകനുമായി സംസാരിക്കാറുണ്ട്. ആ സമയത് ഞാൻ എന്റെ മകനോട് പറയാറുണ്ട്, ആര് എങ്ങനെ കളിച്ചാലും ശരി, യുവരാജ് ഒരു ഓവറിൽ അടിച്ചുകൂട്ടിയ ആ സിക്സറുകൾ, അത് ഇനി ആരും ആവർത്തിക്കാൻ പോകുന്നില്ല,” നവ്യയുടെ ഈ വാക്കുകൾ നിറഞ്ഞ കൈയടികളോടെയാണ് കാണികൾ സ്വീകരിച്ചത്.
തന്റെ പ്രിയപ്പെട്ട താരത്തിൽ നിന്ന് ലഭിച്ച ഈ അഭിനന്ദനത്തിന് കൂപ്പുകൈകളോടെയാണ് യുവരാജ് മറുപടി നൽകിയത്. ക്രിക്കറ്റിനെക്കുറിച്ച് ഇതിൽ കൂടുതൽ വിവരം തനിക്കില്ലെന്ന് നവ്യ തമാശരൂപേണ കൂട്ടിച്ചേർത്തപ്പോൾ വേദിയിൽ ചിരി പടർന്നു. ചടങ്ങിന്റെ വീഡിയോ സമൂഹമാധ്യമങ്ങളില്‍ ഇപ്പോള്‍ വൈറലാണ്.
