ന്യൂദല്‍ഹി : മുഖ്യമന്ത്രിയെ തീരുമാനിക്കാനുളള ചര്‍ച്ചകള്‍ പുരോഗമിക്കെ നേതാക്കള്‍ക്ക് വേണ്ടിയുള്ള പ്രകടനങ്ങളില്‍ കടുത്ത അതൃപ്തി പ്രകടിപ്പിച്ച് കോണ്‍ഗ്രസ് ഹൈക്കമാന്‍ഡ്. കെപിസിസി വിലക്ക് വകവയ്‌ക്കാതെ നേതാക്കള്‍ ശക്തി പ്രകടനങ്ങളില്‍ പങ്കെടുക്കുന്നതില്‍ നടപടിയെടുക്കാന്‍ കെപിസിസി നേതൃത്വത്തോട് ഹൈക്കമാന്‍ഡ് ആവശ്യപ്പെട്ടു.
തെരുവില്‍ പ്രകടനം നടത്തുന്നവര്‍ക്കെതിരെ അച്ചടക്ക നടപടി വേണമെന്നാണ് ആവശ്യം. ആര്‍ക്കെങ്കിലും വേണ്ടി പ്രകടനങ്ങള്‍ നടത്തുന്നതും പരസ്യപ്രസ്താവനകള്‍ നടത്തുന്നതും തെറ്റാണെന്നും വിലക്ക് ലംഘിക്കുന്നവര്‍ക്കെതിരെ കര്‍ശന നടപടി സ്വീകരിക്കുമെന്നും കെപിസിസി അധ്യക്ഷന്‍ സണ്ണിജോസഫ് അറിയിച്ചു. വി.ഡി സതീശന് പിന്തുണ പ്രഖ്യാപിച്ചുകൊണ്ട് സംസ്ഥാനത്തുടനീളം പ്രവര്‍ത്തകര്‍ പ്രകടനം നടത്തുന്ന സാഹചര്യത്തിലാണ് കെപിസിസിയുടെ മുന്നറിയിപ്പ്.
സതീശന് വേണ്ടി ഫ്‌ലക്‌സ് ബോര്‍ഡുകളും സംസ്ഥാനത്ത് വിവിധയിടങ്ങളില്‍ ഉയര്‍ന്നിരുന്നു.മുഖ്യമന്ത്രി സ്ഥാനത്തേക്ക് ഉയര്‍ന്നുകേള്‍ക്കുന്ന പേരുകളിലൊന്നായ എഐസിസി ജനറല്‍ സെക്രട്ടറി കെ.സി വേണുഗോപാലിനെതിരെയും നേരത്തെ ഫ്‌ലക്‌സുകള്‍ ഉയര്‍ന്നിരുന്നു. അല്‍പമെങ്കിലും ഉളുപ്പ് ബാക്കിയുണ്ടെങ്കില്‍ കെ.സി ജനവിധി മാനിക്കണമെന്ന് ചൂണ്ടിക്കാട്ടി കോണ്‍ഗ്രസ് അധ്യക്ഷന്‍ മല്ലികാര്‍ജുന്‍ ഖാര്‍ഗെയുടെ വസതിക്ക് മുന്‍പിലും ഫ്‌ലക്‌സ് ബോര്‍ഡുകള്‍ ഉയര്‍ന്നു.
