ആലപ്പുഴ: ജില്ലയില്‍ വെസ്റ്റ് നൈല്‍ പനി സ്ഥിരീകരിച്ചു. കഞ്ഞിക്കുഴി സ്വദേശിനി അറുപത്തിയഞ്ചുകാരിക്കാണ് രോഗം.നിലവില്‍ ആലപ്പുഴ മെഡിക്കല്‍ കോളേജ് ആശുപത്രിയില്‍ ചികിത്സയിലാണ്.
ഈ വര്‍ഷം ആദ്യമായാണ് ആലപ്പുഴയില്‍ വെസ്റ്റ് നൈല്‍ സ്ഥിരീകരിക്കുന്നത്. ക്യൂലക്സ് കൊതുകുകള്‍ പരത്തുന്ന വൈറസ് രോഗമാണ് ഇത്.ദേശാടനപ്പക്ഷികളില്‍ കാണുന്ന ഫ്‌ലാവി വൈറസാണ് കൊതുകുകടിയിലൂടെ മനുഷ്യരിലേക്ക് എത്തുന്നത്.
വെസ്റ്റ് നൈല്‍ രോഗം സ്ഥിരീകരിച്ചതോടെ ആരോഗ്യവകുപ്പ് ജാഗ്രതാ നിര്‍ദേശം നല്‍കി.കൊതുകുകള്‍ പരത്തുന്ന രോഗമായതിനാല്‍ രോഗപ്രതിരോധത്തിന് കൊതുകുനിവാരണവും ഉറവിടനശീകരണവും പ്രധാനമാണെന്ന് ജില്ലാ മെഡിക്കല്‍ ഓഫീസര്‍ അറിയിച്ചു.
ശുദ്ധജലത്തിലും വെള്ളം കെട്ടിക്കിടക്കുന്ന ഇടങ്ങളിലും ക്യൂലക്സ് കൊതുക് മുട്ടയിട്ടു പെരുകും. അതിനാല്‍ വീടും പരിസരവും വൃത്തിയായി സൂക്ഷിക്കുകയും വെള്ളം കെട്ടിനില്‍ക്കാതെ ശ്രദ്ധിക്കുകയും വേണം.
