തിരുവന്തപുരം: രാജ്യം മുഴുവൻ കാലിന്റെ അടിയിൽ ആണെന്ന് അഹങ്കരിച്ചു നടന്നിരുന്ന കോൺഗ്രസ് എങ്ങിനെയാണ് അധപതിച്ചതെന്നറിയാമോ എന്ന ചോദ്യവുമായി മുന് ഡിജിപി ജേക്കബ് തോമസ്. മുഖ്യമന്ത്രി സ്ഥാനത്തിന് വേണ്ടി സതീശനും കെ.സി. വേണുഗോപാലും രമേശ് ചെന്നിത്തലയും തമ്മിലടിക്കുന്ന പശ്ചാത്തലത്തിലായിരുന്നു ജേക്കബ് തോമസ് ഫെയ്സ്ബുക്കിലൂടെ പ്രതികരിച്ചത്.
“കോണ്ഗ്രസ് എങ്ങനെയാണ് ഇപ്പോൾ കാണുന്ന പോലെ നിലംപതിച്ചത് എന്നു അറിയുമോ?
ഈ അധികാര കൊതി തന്നെ കാരണം”- ജേക്കബ് തോമസ് മറുപടി നല്കുന്നു. ഒപ്പം വേണുഗോപാലിനെതിരെ കോണ്ഗ്രസ് ദേശീയപ്രസിഡന്റ് മല്ലികാര്ജുന് ഖാര്ഗെയുടെ വസതിയ്ക്ക് മുന്നില് സതീശന് അനുകൂലികള് ഉയര്ത്തിയ ഫ്ലക്സ് ബോര്ഡും പങ്കുവെച്ചിട്ടുണ്ട്. ലേശം ഉളുപ്പുണ്ടെങ്കില് കെ.സി. വേണുഗോപാല് ഈ ജനവിധി മാനിക്കണമെന്നാണ് ഈ ബോര്ഡില് സതീശന് അനുകൂലികള് പറയുന്നത്.
“മാറ്റത്തിന് വേണ്ടി വോട്ട് ചെയ്ത പാവം മലയാളികളുടെ അവസ്ഥ!” എന്ന് പരിതപിച്ചുകൊണ്ടാണ് ജേക്കബ് തോമസിന്റെ ഈ ഫെയ്സ്ബുക്ക് പോസ്റ്റ് അവസാനിക്കുന്നത്.
