കൊച്ചി: ആണ്കുട്ടികള്ക്കോ പെണ്കുട്ടികള്ക്കോ മാത്രമായുള്ള സ്കൂളുകള് പൊതുവാക്കി മാറ്റുമ്പോള് എന്തിനാണ് തദ്ദേശ സ്ഥാപനങ്ങളുടെ അനുമതിയെന്ന് ഹൈക്കോടതി. സ്കൂളില് ആണ്കുട്ടികള്ക്കും പ്രവേശനം നല്കുന്നതില് ഈരാറ്റുപേട്ട നഗരസഭയുടെ അനുമതി വൈകുന്നതിനെതിരെ ഈരാറ്റുപേട്ട മുസ്ലിം ഗേള്സ് ഹയര് സെക്കന്ഡറി സ്കൂള് നല്കിയ ഹര്ജി തീര്പ്പാക്കിയ ഉത്തരവിലാണ് ജസ്റ്റിസ് കെ.വി. ജയകുമാറിന്റെ പരാമര്ശം.
മിക്സഡ് സ്കൂളാക്കി മാറ്റുന്നതുമായി ബന്ധപ്പെട്ട് സര്ക്കാറാണ് സര്ക്കുലര് പുറപ്പെടുവിച്ചിട്ടുള്ളതെന്നും വിദ്യാഭ്യാസ ചട്ടത്തില് ഇതുസംബന്ധിച്ച് നിബന്ധനകളില്ലെന്നുമായിരുന്നു ഹര്ജിക്കാരുടെ വാദം. ജൂണ് ഒന്നിന് തുടങ്ങുന്ന അക്കാദമിക് വര്ഷം മുതല് സ്കൂളില് ആണ്കുട്ടികളെയും പ്രവേശിപ്പിക്കേണ്ടതുണ്ടെന്നും ഹര്ജിക്കാര് അറിയിച്ചു.
ആണ്കുട്ടികളെയും പെണ്കുട്ടികളേയും ഒന്നിച്ച് പഠിപ്പിക്കുകയെന്നതാണ് നയമെന്ന് സര്ക്കാര് വ്യക്തമാക്കി.
സമീപ സ്കൂളില് നിന്നുള്ള പരാതി ലഭിച്ചതിനാലാണ് തീരുമാനം വൈകുന്നതെന്നായിരുന്നു നഗരസഭയുടെ വിശദീകരണം. ഹര്ജിക്കാരുടെ അപേക്ഷയില് ഉടന് തീരുമാനമെടുക്കണമെന്ന് നഗരസഭയ്ക്ക് നിര്ദേശം നല്കിയ കോടതി അല്ലാത്തപക്ഷം അനുമതിയില്ലാതെ തന്നെ സ്കൂളില് ആണ്കുട്ടികള്ക്കും പ്രവേശനം നല്കാനുള്ള നടപടിയുമായി മുന്നോട്ട് പോകണമെന്നും ഉത്തരവിട്ടു.
