ഇടുക്കി:കേരള കോണ്‍ഗ്രസുകള്‍ തമ്മില്‍ ഒരു മേശയ്‌ക്ക് അപ്പുറവും ഇപ്പുറവും ഇരുന്നു സംസാരിച്ചാല്‍ തീരുന്ന പ്രശ്‌നങ്ങള്‍ മാത്രമേ ഉള്ളൂ എന്ന് കേരള കോണ്‍ഗ്രസ് (ജെ) നേതാവ് പി ജെ ജോസഫിന്റെ മകനും നിയുക്ത എം എല്‍ എയുമായ അപു ജോണ്‍ ജോസഫ്. കേരള കോണ്‍ഗ്രസ്-എം തിരിച്ചെത്തിയാല്‍ മുടിയനായ പുത്രനെ സദ്യയൊരുക്കി വരവേറ്റതുപോലെ സ്വീകരിക്കും.
മടങ്ങിവരവിന് തെറ്റ് ഏറ്റുപറയേണ്ടതില്ല. നിയമസഭയില്‍ അവരുടെ പ്രതിനിധി ഇല്ലാത്തത് ദുഃഖകരമായ കാര്യമാണ്. അവര്‍ തിരിച്ചുവരണമെന്നും കേരളത്തില്‍ നിലനില്‍ക്കണമെന്നുമാണ് ആഗ്രഹമെന്നും അപു ജോണ്‍ ജോസഫ് പറഞ്ഞു.
പുതിയ ഭരണത്തില്‍, അര്‍ഹതപ്പെട്ട സ്ഥാനം കേരള കോണ്‍ഗ്രസിന് ലഭിക്കും. തെരഞ്ഞെടുപ്പ് സമയത്ത് യുഡിഎഫില്‍ വിട്ടുവീഴ്ച ചെയ്ത ഏക പാര്‍ട്ടി കേരള കോണ്‍ഗ്രസാണ്.ആ പരിഗണന മന്ത്രിസഭയിലും ലഭിക്കുമെന്ന് അപു ജോണ്‍ ജോസഫ് പ്രതികരിച്ചു.
കര്‍ഷകരുടെ വേദന അറിയുന്ന പ്രസ്ഥാനമെന്ന നിലയില്‍ കൃഷിവകുപ്പ് കേരള കോണ്‍ഗ്രസ് ഏറ്റെടുക്കണമെന്നാണ് ആഗ്രഹമെന്നും അപു ജോണ്‍ ജോസഫ് പറഞ്ഞു.എത്ര മന്ത്രിസ്ഥാനം വേണമെന്നത് ചെയര്‍മാന്‍ തീരുമാനിക്കും.
