ചെന്നൈ:തമിഴ് നാട്ടില്‍ ഡിഎംകെയെ കൈവിട്ട് വിജയുടെ ടി വി കെയുമായി കൈകോര്‍ത്ത കോണ്‍ഗ്രസിനെ കടത്തിവെട്ടുന്ന നീക്കവുമായി ഡിഎംകെയും എഐഎഡിഎംകെയും.ഡിഎംകെയും എഐഎഡിഎംകെയും തമ്മില്‍ സഖ്യ ചര്‍ച്ചകള്‍ തുടങ്ങിയെന്നാണ് റിപ്പോര്‍ട്ട്.എടപ്പാടി പളനി സ്വാമി മുഖ്യമന്ത്രിയും ഉദയനിധി സ്റ്റാലിന്‍ ഉപമുഖ്യമന്ത്രിയുമായി സര്‍ക്കാര്‍ രൂപീകരിക്കാനാണ് നീക്കം. എന്നാല്‍ അത്ര അനായാസമല്ല ഈ നീക്കം.
ഇരു പാര്‍ട്ടികളുടെയും നേതാക്കള്‍ പരസ്പരം ബന്ധപ്പെട്ടു. ദ്രാവിഡ പാര്‍ട്ടികളുടെ ബദല്‍ അവതരിപ്പിച്ച് ടിവികെയെ അകറ്റി നിര്‍ത്തുകയാണ് ലക്ഷ്യം. ഇത്തരമൊരു ചര്‍ച്ച നടന്നതായി ഇരു പാര്‍ട്ടികളുടെയും നേതാക്കള്‍ പരോക്ഷമായി സമ്മതിച്ചു. എന്നാല്‍ സഖ്യം ഉറപ്പായിട്ടില്ലെന്നാണ് അറിയുന്നത്. ബി ജെ പിയെ പുറത്ത് നിര്‍ത്തിയാകും എഐഎഡിഎംകെ, ഡി എം കെയുമായി സഖ്യത്തിലേര്‍പ്പെടുക.
സര്‍ക്കാര്‍ രൂപീകരിക്കാന്‍ അവകാശവാദമുന്നയിച്ച് ടിവികെ നേതാവ് വിജയ് ബുധനാഴ്ച ഗവര്‍ണറെ കണ്ട് 113 പേര്‍ ഒപ്പിട്ട കത്താണ് കൈമാറിയത്. എന്നാല്‍ കേവല ഭൂരിപക്ഷത്തിനുളള 118 അംഗങ്ങളുടെ പിന്തുണ ഉറപ്പാക്കുന്ന കത്ത് നല്‍കാന്‍ ഗവര്‍ണര്‍ രാജേന്ദ്ര അര്‍ലേകര്‍ ആവശ്യപ്പെട്ടെന്നാണ് വിവരം.
മുസ്ലിം ലീഗും സിപിഐയും ഡിഎംകെയ്‌ക്ക് ഒപ്പം നില്‍ക്കുമെന്ന നിലപാടാണ് സ്വീകരിച്ചിട്ടുളളത്. മറ്റ് ചെറുകക്ഷികളില്‍ ആരെയെങ്കിലും ഒപ്പം കൂട്ടി സംസ്ഥാനത്ത് അധികാരത്തിലെത്താനുള്ള ശ്രമത്തിലാണ് ടിവികെ.
അതിനിടെ ഡിഎംകെ ചേരിയിലുള്ള വിസികെ ,ടിവികെയുമായുള്ള ചര്‍ച്ച വേണ്ടെന്ന് വച്ചു. സിപിഎം നേതാക്കള്‍ എംകെ സ്റ്റാലിനെ കണ്ട് രണ്ട് സീറ്റിലെ വിജയത്തിന് നന്ദി അറിയിച്ചു. പിഎംകെ, ഡിഎംഡികെ തുടങ്ങിയ കക്ഷികളും ടിവികെയോട് സഖ്യമുണ്ടാക്കുന്ന ലക്ഷണമില്ല.
