കൊച്ചി:യുഡിഎഫ് തരംഗത്തിലും തങ്ങള് പിടിച്ചു നിന്നുവെന്ന് ട്വന്റി 20 അധ്യക്ഷന് സാബു എം.ജേക്കബ്. തെരഞ്ഞെടുപ്പില് നേട്ടമുണ്ടാക്കി. അതിന്റെ അന്തിമ കണക്കുകള് കൂട്ടി വരുന്നതേയുള്ളു. ട്വന്റി 20 സ്വതന്ത്രമായി പ്രവര്ത്തിച്ചു കൊണ്ടിരുന്ന പാര്ട്ടിയാണ്.
എന്നാല് ഒരു മുന്നണിയുടെ ഭാഗമായി വന്നപ്പോള് അതിനെ പല രീതിയിലും എല്ഡിഎഫും യുഡിഎഫും ചിത്രീകരിച്ചു. ഒരു വര്ഗീയ പാര്ട്ടിക്കൊപ്പം കൂടിയെന്ന് ചിത്രീകരിച്ചു. സംഘികളാക്കി മാറ്റി. കുന്നത്തുനാട് പോലുള്ള ക്രിസ്ത്യന് മേഖലകളില് ഇത് ആശയക്കുഴപ്പം സൃഷ്ടിച്ചു. ആശയക്കുഴപ്പം മാറ്റി എടുക്കാനുള്ള സമയം ഈ തെരഞ്ഞെടുപ്പില് ഉണ്ടായില്ലെന്നും സാബു എം ജേക്കബ് പറഞ്ഞു.
സഖ്യം രൂപീകരിച്ച് ഏതാനും ആഴ്ചകള്ക്കുള്ളില് തന്നെ മത്സര രംഗത്തേക്ക് പോയി. കോണ്ഗ്രസും എല്ഡിഎഫും നല്ല രീതിയില് അത് ഉപയോഗിച്ചു.
തോറ്റ പാര്ട്ടികള് പിരിച്ചു വിടുകയാണെങ്കില് പണ്ടേ കോണ്ഗ്രസ് പിരിച്ചു വിടേണ്ടതായിരുന്നുവെന്ന് സാബു എം.ജേക്കബ് പറഞ്ഞു. കുന്നത്തുനാട്ടിലെ വിജയത്തിനുശേഷം ട്വന്റി 20 പിരിച്ചുവിടണമെന്ന് വി.പി.സജീന്ദ്രന് പറഞ്ഞിരുന്നു. ഇതിനു മറുപടിയായിട്ടാണ് സാബു എം. ജേക്കബ് രംഗത്തെത്തിയത്.
കഴിഞ്ഞ തെരഞ്ഞെടുപ്പില് വി.പി.സജീന്ദ്രന് തോറ്റപ്പോള് എന്തുകൊണ്ട് പാര്ട്ടി പിരിച്ചു വിട്ടില്ലെന്ന് സാബു ജേക്കബ് ചോദിച്ചു. തെരഞ്ഞെടുപ്പില് എത്രയോ മന്ത്രിമാര് തോറ്റിട്ടുണ്ട്. ഇതിന് മുമ്പ് എത്രയോ കോണ്ഗ്രസുകാര് തോറ്റു. കഴിഞ്ഞ തവണ അവര്ക്ക് 40 സീറ്റ് അല്ലേ കിട്ടിയിരുന്നുള്ളു. എന്തുകൊണ്ട് അന്ന് പാര്ട്ടി പിരിച്ചു വിട്ടില്ലെന്നും സാബു എം. ജേക്കബ് ചോദിച്ചു.
