ചെന്നൈ:തമിഴ്നാട് നിയമസഭ തെരഞ്ഞെടുപ്പിന്റെ ഫലമറിയാന് രണ്ട് ദിവസം മാത്രം ശേഷിക്കെ ഡി എം കെ സഖ്യത്തിലെ അസ്വാരസ്യം പരസ്യമായി. ഡി എം കെയെ വിമര്ശിച്ച് സി പി എം രംഗത്തെത്തി. ഇടതുപാര്ട്ടികളെ ഡി എം കെ അംഗീകരിച്ചില്ലെന്ന് സി പി എം പി ബി അംഗം കെ ബാലകൃഷ്ണനാണ് വിമര്ശിച്ചത്.അഞ്ച് സീറ്റിലേക്ക് ഇടത് പാര്ട്ടികളെ ഒതുക്കിയത് ശരിയായ നിലപാടായിരുന്നില്ല.
തമിഴ്നാട്ടില് രണ്ടക്ക സാമ്പത്തികവളര്ച്ച ഉണ്ടെന്നാണ് മന്ത്രിമാര് പറഞ്ഞിരുന്നത്. അങ്ങനെയെങ്കില് തൊഴിലാളികളുടെ അധ്വാനവും കാരണമാണ്. ഈ തൊഴിലാളികള്ക്ക് സര്ക്കാര് എന്ത് നല്കിയെന്ന് ബാലകൃഷ്ണന് ചോദിച്ചു.വിജയ് ഫാക്ടര് ഉണ്ടെന്ന പരോക്ഷ സൂചനയും അദ്ദേഹം നല്കി
അതേസമയം കെ ബാലകൃഷ്ണന്റെ വിമര്ശനത്തിന് മറുപടിയുമായി ഡി എം കെയും രംഗത്തെത്തി. ബാലകൃഷ്ണന് എന്തുകൊണ്ടാണ് അങ്ങനെ പറഞ്ഞതെന്ന് അറിയില്ലെന്നായിരുന്നു ഡി എം കെ വക്താവ് ടി കെ എസ് ഇളങ്കോവന് പ്രതികരിച്ചത്. ഇടത് പാര്ട്ടികള് ഡി എം കെയ്ക്കൊപ്പം തന്നെയാണെന്നും 1967 മുതലുള്ള ബന്ധം ആണെന്നും പെരിയാറിനെ കണ്ടില്ലായിരുന്നെങ്കില് കമ്മ്യൂണിസ്റ്റ് ആയേനെ എന്നാണ് കരുണാനിധി പറഞ്ഞിട്ടുള്ളതെന്നും അദ്ദേഹം ചൂണ്ടിക്കാട്ടി.
