ചെന്നൈ: തമിഴ്നാട് നിയമസഭാ തെരഞ്ഞെടുപ്പില്‍ പാര്‍ട്ടി കനത്ത തിരിച്ചടി നേരിട്ടപ്പോള്‍ ഉപമുഖ്യമന്ത്രി ഉദയനിധി സ്റ്റാലിന്‍ വിജയിച്ചത് ഡിഎംകെയ്‌ക്ക് ആശ്വാസമായി . പാര്‍ട്ടിയുടെ ഉറച്ച കോട്ടയായ ചെപ്പോക്ക്-തിരുവള്ളിക്കേനി മണ്ഡലത്തില്‍ തമിഴക വെട്രി കഴകം സ്ഥാനാര്‍ത്ഥി ഡി. സെല്‍വത്തെയാണ് ഉദയനിധി പരാജയപ്പെടുത്തി സീറ്റ് നിലനിര്‍ത്തിയത്. 7,140 വോട്ടുകള്‍ക്കാണ് ഉദയനിധി സ്റ്റാലിന്റെ വിജയം.
2021ല്‍ ഏകദേശം 70,000 വോട്ടുകളുടെ ഭൂരിപക്ഷത്തിന് ജയിച്ച ഉദയനിധിക്ക് ഇത്തവണ ടിവികെ സ്ഥാനാര്‍ത്ഥിയില്‍ നിന്ന് ശക്തമായ വെല്ലുവിളിയാണ് നേരിടേണ്ടി വന്നത്. എട്ടാം റൗണ്ടില്‍ ഉദയനിധിയുടെ ലീഡ് 1,048 വോട്ടുകളായി കുറഞ്ഞത് ഡിഎംകെ ക്യാമ്പിനെ ആശങ്കയിലാക്കി. എഐഎഡിഎംകെയുടെ ആദി രാജാറാം ഇവിടെ മൂന്നാം സ്ഥാനത്തായി.
കരുണാനിധി മൂന്ന് തവണ പ്രതിനിധീകരിച്ച മണ്ഡലമായ ചെപ്പോക്ക് ഡിഎംകെയുടെ അഭിമാന സീറ്റാണ്. സ്റ്റാലിന്‍ പരാജയത്തില്‍ അമ്പരന്നു നില്‍ക്കുന്ന ഡി എം കെയ്‌ക്ക് ആശ്വാസമാണ് ഉദയനിധിയുടെ വിജയം.
