തിരുവനന്തപുരം :കോണ്ഗ്രസില് മുഖ്യമന്ത്രി പദവിയുമായി ബന്ധപ്പെട്ട് ഘടകകക്ഷികളുമായി ചര്ച്ച നടത്തിയെന്ന് കേരളത്തിന്റെ ചുമതലയുള്ള എഐസിസി ജനറല് സെക്രട്ടറി ദീപാ ദാസ് മുന്ഷി. ഘടകകക്ഷികള് സ്വതന്ത്രമായ അഭിപ്രായം പറഞ്ഞിട്ടുണ്ട്. എംഎല്എമാരുടെ അഭിപ്രായങ്ങളും തേടും. അന്തിമ തീരുമാനം എടുക്കുന്നത് കോണ്ഗ്രസ് ഹൈക്കമാന്റാണ് എന്നും ദീപാദാസ് മുന്ഷി പറഞ്ഞു. വലിയ ആത്മവിശ്വാസത്തിലാണെന്നും തെരഞ്ഞെടുപ്പില് വന് മാര്ജിനില് വിജയിക്കുമെന്നും അവര് അവകാശപ്പെട്ടു.
അതിനിടെ,തെരഞ്ഞെടുപ്പ് ഫലം വരാന് മണിക്കൂറുകള് മാത്രം ശേഷിക്കെ കെപിസിസി ആസ്ഥാനത്തിന് മുന്നില് യുഡിഎഫ് വിജയമുറപ്പിച്ച് പന്തല് ഒരുങ്ങി.പായസത്തിനും ലഡുവിനുമുള്ള സജ്ജീകരണങ്ങള് ഏര്പ്പെടുത്തി. വൈകുന്നേരം ഡിജെ പരിപാടി ഉണ്ടാകും.വലിയ ജനവികാരമായിരിക്കും എല്ഡിഎഫിനെതിരെ ഉണ്ടാവുകയെന്ന് കോണ്ഗ്രസ് നേതാക്കള് പറയുന്നു.
ചൊവ്വാഴ്ച എഐസിസി നിരീക്ഷകര് പങ്കെടുക്കുന്ന സ്ക്രീനിംഗ് കമ്മിറ്റി യോഗം തിരുവനന്തപുരത്ത് ചേരും. മുഖ്യമന്ത്രി ചര്ച്ചയില് എംഎല്എമാര്, കെപിസിസി ഭാരവാഹികള്, മുതിര്ന്ന നേതാക്കള്, ഘടകകക്ഷികള് എന്നിവരുടെ അഭിപ്രായവും ഹൈക്കമാന്ഡ് തേടും. മുഖ്യമന്ത്രി പദവിക്കായി മൂന്നില് കൂടുതല് പേരുകള് പരിഗണനയ്ക്ക് വരട്ടെ എന്നാണ് ഹൈക്കമാന്ഡ് നിലപാട്.
