ന്യൂദല്ഹി:തമിഴ്നാട് നടന് വിജയിന്റെ ടിവികെ ഭരിയ്ക്കുമെന്നും വിജയ് മുഖ്യമന്ത്രിയാകുമെന്നും ഉള്ള പ്രദീപ് ഗുപ്തയുടെ ആക്സിസ് മൈ ഇന്ത്യയുടെ എക്സിറ്റ് പോള് പ്രവചനം വലിയ അബദ്ധത്തില് കലാശിക്കുമോ എന്ന് സംശയം. 2024ലെ ലോക് സഭാ തെരഞ്ഞെടുപ്പില് എന്ഡിഎയ്ക്ക് 400 സീറ്റ് പ്രവചിച്ചുകൊണ്ട് പ്രദീപ് ഗുപ്ത നടത്തിയ തെറ്റ് തമിഴ്നാട്ടില് വിജയിന് വിജയം പ്രഖ്യാപിച്ചുകൊണ്ട് ആവര്ത്തിക്കുമെന്ന് കരുതുന്നു.
നടന് വിജയിന്റെ ടിവികെ പാര്ട്ടി 98 മുതല് 124 സീറ്റുകള് വരെ നേടുമെന്നാണ് പ്രവചനം. 234 ആണ് സഭയിലെ ആകെ അംഗങ്ങളുടെ എണ്ണം. 118 സീറ്റുകള് കിട്ടിയാല് കേവല ഭൂരിപക്ഷമായി. പക്ഷെ ഈ വിജയത്തിലെത്തുന്നതിന് പ്രദീപ് ഗുപ്ത പ്രവചിക്കുന്ന വഴികള് കാണുമ്പോള് അത്ര യുക്തിപരമായി തോന്നുന്നില്ലെന്ന് ചില നിരീക്ഷകര് ചൂണ്ടിക്കാട്ടുന്നു.18 മുതല് 39 വരെ പ്രായമുള്ള തമിഴ്നാട്ടിലെ വോട്ടര്മാര് വിജയിന്റെ പാര്ട്ടിക്ക് അനകൂലമായി വന്തോതില് വോട്ടുചെയ്യുമെന്നതാണ് പ്രദീപ് ഗുപ്തയുടെ ഒരു പ്രവചനം. ഇതില് 18 മുതല് 19 വയസ്സ് വരെയുള്ള വോട്ടര്മാരുടെ കാര്യത്തില് വിജയിന് അനുകൂലമായി 68 ശതമാനം വോട്ടുകളുടെ കുതിപ്പുണ്ടാകുമെന്നും ഡിഎംകെയ്ക്ക് 18 ശതമാനവും എഐഎഡിഎംകെയ്ക്ക് 36 ശതമാനവും വോട്ട് നഷ്ടം ഈ പ്രായക്കാരില് നിന്നും ഉണ്ടാകുമെന്ന് കരുതുന്നു. 20 മുതല് 29 വയസ്സുവരെയുള്ള പ്രായക്ക്രാരിലും വിജയിന് 58 ശതമാനം വോട്ട് ലഭിക്കുമെന്നും ഡിഎംകെയ്ക്ക് 20 ശതമാനവും എഐഎഡിഎംകെയ്ക്ക് 29 ശതമാനവും ഈ പ്രായക്കാരില് നിന്നും വോട്ട് നഷ്ടമുണ്ടാകുമെന്നും പ്രദീപ് ഗുപ്ത പ്രവചിക്കുന്നു. അതുപോലെ തന്നെ 30 മുതല് 39 വരെയുള്ള പ്രായക്കാരില് വിജയിന് 45 ശതമാനം വോട്ട് ലഭിക്കുമ്പോള് ഡിഎംകെയ്ക്ക് 18 ശതമാനവും എഐഎഡിഎംകെയ്ക്ക് 24 ശതമാനവും വോട്ട് നഷ്ടമുണ്ടാകുമെന്നും പ്രദീപ് ഗുപ്ത പ്രവചിക്കുന്നു.
അതിശക്തമായ പ്രചാരണം നടത്തിയ തമിഴ്നാട്ടിലെ പരമ്പരാഗത ദ്രാവിഡ പാര്ട്ടികളായ ഡിഎംകെയ്ക്കും എഐഎ ഡിഎംകെയ്ക്കും 18 മുതല് 39 വരെയുള്ള പ്രായക്കാരില്നിന്നും ഇത്രയും വോട്ട് നഷ്മമുണ്ടാകുമെന്ന് കരുതുന്നില്ലെന്നാണ് പല നിരീക്ഷകരും അഭിപ്രായപ്പെടുന്നത്. വിജയിന് അനുകൂലമായ തരംഗം ഉണ്ടാകുമെങ്കിലും അത് ഇത്രത്തോളം അധികം ശതമാനം ഉണ്ടാകില്ലെന്നും ചൂണ്ടിക്കാണിക്കപ്പെടുന്നു.
എന്.ടി രാമറാവു, എംജിആര് തുടങ്ങിയ താരങ്ങള് അവരുടെ സിനിമയിലെ പ്രശസ്തി മുതലാക്കി ജനഹൃദയം കീഴടക്കിയതുപോലെയുള്ള ഒരു അസാധാരണപ്രതിഭാസം തമിഴ്നാട്ടില് സംഭവിച്ചുവെന്ന പ്രദീപ് ഗുപ്തയുടെ പ്രവചനവും പാളിയേക്കുമെന്ന് കരുതുന്നു. കാരണം പഴയ കാലത്തേതുപോലെ അത്രയ്ക്ക് താരവിധേയത്വം ഇന്നത്തെ തമിഴകത്തിനില്ല. പ്രത്യേകിച്ചും താരമൂല്യം കൊണ്ട് ഭരണം പിടിക്കാവുന്ന തരത്തിലുള്ള അട്ടിമറിയൊന്നും സാധിക്കില്ലെന്നാണ് പലരും നിരീക്ഷിക്കുന്നത്. രജനീകാന്ത് രാഷ്ട്രീയത്തിലിറങ്ങാതിരുന്നത് ഈ ബോധ്യം കൊണ്ടാണെന്നും ചൂണ്ടിക്കാണിക്കപ്പെടുന്നു.
അതുപോലെ പ്രദീപ് ഗുപ്ത കാണിച്ച മറ്റൊരു മണ്ടത്തരം വിജയിന് അനൂകൂലമായി തമിഴ്നാട്ടിലെ മൃഗീയ ഭൂരിപക്ഷം സ്ത്രീകളും വോട്ടുചെയ്യുമെന്ന രീതിയില് നടത്തിയപ്രവചനമാണ്. സ്ത്രീകളുടെ വോട്ടില് 38 ശതമാനം അനകൂലമായി ഉണ്ടാകുമെന്നാണ് പ്രദീപ് ഗുപ്ത കണക്കാക്കുന്നു. കാരണം ഡിഎംകെയും എഐഎഡിഎംകെയും സ്ത്രീകള്ക്ക് വലിയ വാഗ്ദാനങ്ങള് നല്കിയ പശ്ചാത്തലത്തില് വിജയിന് അനകൂലമായി ഇത്രയും വലിയ സ്ത്രീകളുടെ ചായ് വ് ഉണ്ടാകില്ലെന്നാണ് വിദഗ്ധരുടെ അഭിപ്രായം.
വിസില് എന്ന ചിഹ്നം കൊണ്ട് വളരെ എളുപ്പത്തില് വിജയ് വോട്ടര്മാരെ കീഴടക്കിയെന്നാണ് പ്രദീപ് ഗുപ്തയുടെ മറ്റൊരു അവകാശവാദം.തനിക്ക് പരിചയമുള്ള തമിഴ്നാട്ടിലെ ഒരു വീട്ടിലെ ഏഴ് വയസ്സുകാരിയായ കുട്ടി വിജയിന് വോട്ട് ചെയ്തില്ലെങ്കില് താന് മിണ്ടില്ലെന്ന് പപ്പയോട് പറഞ്ഞെന്നും ഒരു പാചകക്കാരിയായ സ്ത്രീ താന് വിസിലിനാണ് വോട്ട് ചെയ്തതെന്നും തന്റെ മകള് തന്നോട് വിസിലിന് വോട്ട് ചെയ്യണമെന്ന് പറഞ്ഞ് ഫോണ് വിളിച്ചതുകൊണ്ട് മാത്രമാണ് താന് വിസിലിന് വോട്ട് ചെയ്തതെന്ന് ആ സ്ത്രീ പറഞ്ഞെന്നും ഇതെല്ലാം അസാധാരണമായ വിജയ് അനുകൂല ഘടകങ്ങളാണെന്നും പ്രദീപ് ഗുപ്ത വാദിക്കുന്നു.
2024ല് ബിജപി നേതൃത്വത്തിലുള്ള എന്ഡിഎയ്ക്ക് 361 മുതല് 400 സീറ്റുവരെ പ്രവചിച്ചിരുന്നു പ്രദീപ് ഗുപ്തയുടെ ആക്സിസ് മൈ ഇന്ത്യ. ബിജെപി യുപിയില് നിന്നും എന്ഡിഎ 80 ലോക്സഭാ സീറ്റ് നേടുമെന്നും പ്രവചിച്ചു. പക്ഷെ യുപിയില് നിന്നും ആകെ കിട്ടയത് 36 സീറ്റുകള് മാത്രമായിരുന്നു. എന്ഡിഎയ്ക്ക് ഭരണം നിലനിര്ത്താനായെങ്കിലും 240 സീറ്റുകളേ കിട്ടിയുള്ളൂ. തന്റെ ഫലപ്രഖ്യാപനം പാളിയതോടെ ഇന്ത്യാ ടുഡേ ടിവിയില് തെരഞ്ഞെടുപ്പ് ഫലപ്രഖ്യാപനം നടത്തുന്ന പരിപാടിക്കിടയില് പ്രദീപ് ഗുപ്ത പൊട്ടിക്കരയുകയായിരുന്നു. ഇതുപോലെ തമിഴ്നാട്ടില് വിജയ് അധികാരം നേടുമെന്ന് പ്രവചിച്ചതിന്റെ പേരിലും പ്രദീപ് ഗുപ്തയ്ക്ക് ദുഖിക്കേണ്ടിവരുമെന്ന് പലരും അഭിപ്രായപ്പെടുന്നു. അതുപോലെ ഒബിസി, എസ് സി, എസ് ടി വോട്ടുകളും വിജയിന് അനുകൂലമായി വരുമെന്ന് പ്രദീപ് ഗുപ്ത പറയുന്നു. ഇതും തമിഴ്നാട്ടിലെ വോട്ടര്മാരുടെ ചരിത്രം നോക്കിയാല് വിശ്വസനീയമല്ല.
