ന്യൂദല്ഹി: പാകിസ്ഥാനിലും ബംഗ്ലാദേശിലും മതന്യൂനപക്ഷങ്ങള്ക്കെതിരെ നടക്കുന്ന മനുഷ്യാവകാശ ലംഘനങ്ങളില് വിശ്വഹിന്ദു പരിഷത്ത് ആശങ്ക പ്രകടിപ്പിച്ചു. പീഡനങ്ങളും നിർബന്ധിത മതപരിവര്ത്തനവും അവസാനിപ്പിക്കാന് ഐക്യരാഷ്ട്രസഭയുടെ അടിയന്തരമായി ഇടപെടണമെന്ന് ആവശ്യപ്പെട്ട് വിഎച്ച്പി അന്താരാഷ്ട്ര പ്രസിഡന്റ് ആലോക് കുമാര് യുഎന് ജനറല് അസംബ്ലി പ്രസിഡന്റ് അന്നലീന ബെയര്ബോക്കിന് കത്തെഴുതി.
യുഎന്നിന്റെ തന്നെ റിപ്പോര്ട്ടുകള് അനുസരിച്ച് പാകിസ്ഥാനില് നിര്ബന്ധിത മതപരിവര്ത്തനങ്ങളും പ്രായപൂര്ത്തിയാകാത്ത പെണ്കുട്ടികളുടെ വിവാഹങ്ങളും ആശങ്കാജനകമായ തോതില് ഉയര്ന്നിട്ടുണ്ടെന്ന് ആലോക് കുമാര് ചൂണ്ടിക്കാട്ടി. ഇരകളില് ഭൂരിഭാഗവും ഹിന്ദു, ക്രിസ്ത്യന് സമൂഹങ്ങളില് നിന്നുള്ളവരാണ്. സിന്ധ് പ്രവിശ്യയിലാണ് ഇത്തരം സംഭവങ്ങള് വ്യാപകമായിട്ടുള്ളത്. പരാതികളോട് പാകിസ്ഥാന് നിയമ നിര്വ്വഹണ ഏജന്സികളുടെ പ്രതികരണം ദുര്ബലമാണ്.
ബംഗ്ലാദേശില് ഹിന്ദുക്കളടക്കമുള്ള മതന്യൂനപക്ഷങ്ങളോടുള്ള അക്രമങ്ങള് അവസാനമില്ലാതെ തുടരുകയാണ്. ഗുരുതരമായ മനുഷ്യാവകാശ ലംഘനങ്ങള് തടയുന്നതിന് ഫലപ്രദമായ നടപടികള് സ്വീകരിക്കേണ്ട ഉത്തരവാദിത്തം ഐക്യരാഷ്ട്രസഭയ്ക്കുണ്ട്, കത്തില് ആലോക് കുമാര് ചൂണ്ടിക്കാട്ടി. കത്തിന്റെ ഒരു പകര്പ്പ് യുഎന് സെക്രട്ടറി ജനറലിനും പ്രധാനമന്ത്രി നരേന്ദ്ര മോദിക്കും വിദേശകാര്യ മന്ത്രി എസ്. ജയശങ്കറിനും അയച്ചിട്ടുണ്ട്.
