ന്യൂദല്ഹി: രാജ്യമൊട്ടാകെ കൊടുംചൂടില് വെന്തുരുകുന്നു. എങ്ങും വൈദ്യുതിയുടെ ആവശ്യം കുത്തനെ ഉയരുകയാണ്. ഇതുവരെ ഉണ്ടായിട്ടില്ലാത്ത തരത്തിലാണ് ഡിമാന്ഡ് ഉയരുന്നതെന്ന് വാര്ത്താ ഏജന്സികള് റിപ്പോര്ട്ട് ചെയ്യുതു.
തിങ്കളാഴ്ച പീക്ക് സമയത്ത് 255.85 ജിഗാ വാട്ടാണ് രാജ്യമെങ്ങുമായി ഉപയോഗിച്ചത്. ഏപ്രില് 24ന് ഇത് 252.07 ജിഗാവാട്ടായിരുന്നു. ഫാനുകള്, എയര് കണ്ടീഷണറുകള്, കൂളറുകള് എന്നിവയുടെ ഉപയോഗം അമ്പരപ്പിക്കും വിധമാണ് ഉയര്ന്നിരിക്കുന്നത്. ചിലയിടങ്ങളില് ഒറ്റപ്പെട്ട മഴ പെയ്തതും പൊടിക്കാറ്റും ചൂട് അല്പ്പം കുറച്ചിട്ടുണ്ട്.
മുഴുവന് ആശുപത്രികളിലും ചെറിയ ക്ലിനിക്കിലും വരെ ചൂട് മൂലമുള്ള ആരോഗ്യപ്രശ്നങ്ങള് പരിഹരിക്കാനുള്ള യൂണിറ്റുകള് അടിയന്തമായി തുടങ്ങാന് കേന്ദ്രം സംസ്ഥാനങ്ങള്ക്ക് നിര്ദേശം നല്കിയിട്ടുണ്ട്. മെയ് മാസത്തിലും വൈദ്യുതി ഡിമാന്ഡ് വളരെ ഉയര്ന്ന് നില്ക്കുമെന്നാണ് കേന്ദ്രം കരുതുന്നത്. പീക്ക് സമയത്തെ ഡിമാന്ഡ് 270 ജിഗാവാട്ട് ആയി ഉയരുമെന്നാണ് കണക്കുകൂട്ടല്.
