കൊച്ചി: ചക്ക വീണ് മൂര്ഖന് പാമ്പ് ചത്തു. തിരുമാറാടി ഒലിയപ്പുറത്താണ് സംഭവം.
വീട്ടുമുറ്റത്തായി നാല് ചക്കകള് വീണ് കിടന്നിരുന്നു.അതെടുക്കാന് വീട്ടുകാര് ചെന്നപ്പോഴാണ് പാമ്പ് ചത്ത് കിടക്കുന്നത് കണ്ടത്. അതേസമയം, ഇന്നും സംസ്ഥാനത്ത് നിരവധി പേര്ക്ക് പാമ്പ് കടിയേറ്റു.
കാസര്ഗോഡ് എളേരിത്തട്ടില് നാലരവയസുള്ള കുട്ടിയെ മൂര്ഖന് പാമ്പ് കടിച്ചു. കളിക്കുന്നതിനിടെയാണ് പാമ്പ് കടിയേറ്റത്. കുട്ടി പരിയാരം മെഡിക്കല് കോളേജ് ആശുപത്രിയില് തീവ്ര പരിചരണ വിഭാഗത്തില് ചികിത്സയിലാണ്.
കോഴിക്കോട് പൂനൂരില് 22 വയസുളള മുഹമ്മദ് അന്സാറിനും പാമ്പുകടിയേറ്റു.പുലര്ച്ചെ കിടക്കയില് പാമ്പിനെ കണ്ട് പരിശോധിച്ചപ്പോഴാണ് കടിയേറ്റ കാര്യം അറിയുന്നത്. യുവാവിനെ കോഴിക്കോട് മെഡിക്കല് കോളേജ് ആശുപത്രിയില് പ്രവേശിപ്പിച്ചു.കോഴിക്കോട് പേരാമ്പ്ര കണ്ണിപ്പൊയില് ചിത്രാഞ്ജലിയില് ശിവദാസന്റെ മകള് അഞ്ജലി (36)ക്കും പാമ്പ് കടിയേറ്റതിനെ തുടര്ന്ന് ചികിത്സയിലാണ്.
തിരുവനന്തപുരം കിളിമാനൂരില് തൂളിക്കുഴി സ്വദേശി സരിതയ്ക്ക് പാമ്പുകടിയേറ്റു. വീട്ടുമുറ്റത്തേക്ക് ഇറങ്ങിയപ്പോഴാണ് പാമ്പ് കടിച്ചത്.സരിതയെ വെഞ്ഞാറമൂട്ടിലെ സ്വകാര്യ ആശുപത്രിയില് പ്രവേശിപ്പിച്ചു.
തിരുവനന്തപുരം പെരുങ്ങുഴി സ്വദേശി ഭുവന ചന്ദ്രനും പാമ്പ് കടിയേറ്റ് ആശുപത്രിയില് ചികിത്സയിലാണ്.തിരുവനന്തപുരത്ത് വട്ടപ്പാറ കുറ്റിയാണി തെങ്ങുംപണ വീട്ടില് ജഗദീഷിന്റെ മകന് അഭിനവിനെ(15) പാമ്പ് കടിച്ചതിനെ തുടര്ന്ന് തിരുവനന്തപുരം മെഡിക്കല് കോളേജ് ആശുപത്രിയില് പ്രവേശിപ്പിച്ചു.
ഇരിങ്ങാലക്കുട കാറളത്തും രണ്ടുപേര്ക്ക് പാമ്പ് കടിയേറ്റു. കാറളം പുല്ലത്തറ വെള്ളേപ്പറമ്പില് വീട്ടില് പ്രസീത, നടവരമ്പ് സ്വദേശിയായ പിടുക്കാട്ടില് സനീഷ് എന്നിവര്ക്കാണ് കടിയേറ്റത്. മലപ്പുറം എടപ്പാളില് 21കാരിയായ ഷഹല തസ്നിക്കും പാമ്പ് കടിയേറ്റു.
