കോട്ടയം: സ്വാമി വിവേകാനന്ദനെയും ഉത്തര്പ്രദേശ് മുഖ്യമന്ത്രി യോഗി ആദിത്യനാഥിനേയും സാമൂഹികമാധ്യമത്തിലൂടെ അധിക്ഷേപിക്കുകയും വികലമായി ചിത്രീകരിക്കുകയും ചെയ്ത ബാലരമയിലെ മുന് ചിത്രകാരന് രാജീവ് പള്ളിക്കോണത്തിന്റെ നടപടിയില് പ്രതിഷേധിച്ച് വിശ്വഹിന്ദു പരിഷത്ത് കോട്ടയം താലൂക്ക് സമിതി മാര്ച്ച് നടത്തി. കോട്ടയത്ത് പള്ളിക്കോണത്തിന് സമീപം ആലുംമൂട്ടില് നടത്തിയ പ്രതിഷേധയോഗവും മാര്ച്ചും വിശ്വഹിന്ദു പരിഷത്ത് സംസ്ഥാന ജനറല് സെക്രട്ടറി അഡ്വ. അനില് വിളയില് ഉദ്ഘാടനം ചെയ്തു.
രാജീവ് പള്ളിക്കോണത്തിന്റെ അധിക്ഷേപ ഫേസ്ബുക്ക് പോസ്റ്റ് ഹിന്ദു സമൂഹത്തിനെതിരേയുള്ള ആസൂത്രിത കടന്നാക്രമണത്തിന്റെ ഭാഗമാണെന്ന് അനില്വിളയില് പറഞ്ഞു. സമീപകാലത്ത് ഹിന്ദു സമൂഹത്തിനെതിരേ നിരന്തരം അധിക്ഷേപങ്ങള് നടക്കുന്നു. ഇങ്ങനെ അധിക്ഷേപിക്കുന്നവര്ക്കെതിരേ ഭരണ-പ്രതിപക്ഷങ്ങള് മൗനം പാലിക്കുകയാണ്.
അത്തരക്കാര്ക്ക് പുരസ്കാരങ്ങള് നല്കി ആദരിക്കുകയാണ് കേരളത്തില്. എന്തും ഏതും എഴുതിയും വരച്ചും പ്രസിദ്ധീകരിച്ചാല് ആവിഷ്കാര സ്വാതന്ത്ര്യമാകുമെങ്കില് അതിന് തടയിട്ടേണ്ടതുണ്ട്. കാരണം ഇതെല്ലാം ഹിന്ദു സമൂഹത്തിനെതിരേയാണ്. ഇതര സമൂഹങ്ങള്ക്കെതിരേ ആവിഷ്കാര സ്വാതന്ത്ര്യം പ്രയോഗിച്ചപ്പോള് നടന്നതെന്താണെന്ന് നമ്മള് കണ്ടു.
മന്തിക്കടയുടെ പരസ്യവും ഒറ്റപ്പെട്ടതല്ലെന്ന് പിന്നീട് സമൂഹം മനസിലാക്കി. കേരളത്തിലും കര്ണ്ണാടകയിലുമായി പത്തോളം സ്ഥലങ്ങളില് ഒരേ കാര്യം നടന്നെങ്കില് ഹൈന്ദവ നിന്ദക്ക് ഇതില് കൂടുതല് തെളിവ് ആവശ്യമില്ല.
ഇവിടെയും സര്ക്കാരും പ്രതിപക്ഷവും മൗനം പാലിച്ചെന്നും അദ്ദേഹം പറഞ്ഞു. പ്രതിഷേധ പ്രകടനം വീടിന് സമീപത്തു പോലീസ് തടഞ്ഞു.
