മനുഷ്യമനസ്സിനെയും ജീവിതത്തെയും മലിനമാക്കുന്ന ദുര്‍വികാരവിചാരങ്ങളെയാണ് കലി എന്ന പദം കൊണ്ട് അര്‍ത്ഥമാക്കിയിരിക്കുന്നത്. മനുഷ്യന്റെ കാമക്രോധലോഭമോഹമദമാത്സര്യങ്ങളാണ് കലിദോഷത്തിന് ജന്മം നല്‍കുകയും വളര്‍ത്തുകയും ചെയ്യുന്നത്. അതുകൊണ്ട് അവയെ ജയിക്കുവാന്‍ സാധിച്ചാല്‍ തന്നെ കലിദോഷമുക്തിയും കൈവരും. ധര്‍മ്മാനുഷ്ഠാനം കൊണ്ടും ഈശ്വരഭജനം കൊണ്ടും മാത്രമേ കാമക്രോധാദികളെ ജയിക്കാന്‍ സാധിക്കുകയുള്ളൂ. അതിനായി ഏവര്‍ക്കും അനുഷ്ഠിക്കാവുന്ന ചില വിധികള്‍ താഴെ കൊടുക്കുന്നു.
1. അതിരാവിലെ തന്നെ ഉറക്കമുണരുന്നതിനും സ്‌നാനം ചെയ്യുന്നതിനും പരിശ്രമിക്കുക. സ്ഥിരമായി അങ്ങിനെ ചെയ്താല്‍തന്നെ മനസ്സും ശരീരവും പ്രസന്നമായിത്തീരും. ഇപ്രകാരം പ്രസന്നമായ മനസ്സോടും ശരീരത്തോടുംകൂടിയവന് മാത്രമേ യഥാവിധി ഈശ്വരഭജനം നടത്തുന്നതിനും സംഘര്‍ഷമില്ലാത്ത ജീവിതം നയിക്കുന്നതിനും സാധിക്കുകയുള്ളൂ.
2. പ്രഭാതത്തില്‍ സ്‌നാനം ചെയ്തതിന് ശേഷം വിളക്ക് കൊളുത്തി ഇഷ്ടദേവതയുടെ സ്‌തോത്രങ്ങള്‍, ഭഗവദ്ഗീത, രാമായണം, ഭാഗവതം, തുടങ്ങിയവയിലേതെങ്കിലും പാരായണം ചെയ്യുന്നത് ശീലമാക്കുക. ഭഗവദ്ഗീത ഒര ദ്ധ്യായമെങ്കിലും ഭക്തിയോടുകൂടി നിത്യവും പാരായണം ചെയ്യുക. അതിലൂടെ തന്നെ ജീവിതത്തില്‍ വളരെ വലുതായ മാറ്റം വരുന്ന
തായി കാണാവുന്നതാണ്.
3. സന്ധ്യാവേളയിലും വിളക്കുകൊളുത്തി പ്രാര്‍ത്ഥിക്കുക. സന്ധ്യാവേളയിലാണ് മനസ്സ് ഏറ്റവും ദുര്‍ബലമായിത്തീരുന്നത്. അതുകൊണ്ട് ഈ സമയത്ത് ഈശ്വരഭജനം നടത്തുന്നതുകൊണ്ട് മനസ്സിന്റെ ദുര്‍ബലതകളെല്ലാം നീക്കി വലുതായ മനശക്തി കൈവരിക്കാന്‍ സഹായകമാകുന്നു. സന്ധ്യാവേളയില്‍ ടിവി കാണുക, ഭക്ഷണം കഴിക്കുക, യാത്ര പോവുക, മറ്റെന്തെങ്കിലും പ്രവൃത്തികളില്‍ വ്യാപൃതനായിരിക്കുക തുടങ്ങിയവ ഒഴിവാക്കുക.
4. മാംസഭക്ഷണം കഴിവതും ഒഴിവാക്കുക. മാംസഭക്ഷണം മനസ്സിനെയെന്നപോലെതന്നെ ശരീരത്തെയും ദുഷിപ്പിക്കുന്നു. സ്ഥിരമായി മാംസം കഴിക്കുന്നവ രിലാണ് ദുര്‍വാസനകളും രോഗങ്ങളും അധികമായിരിക്കുന്നതെന്ന് കാണാവുന്നതാണ്. അതുപോലെതന്നെ പഴകിയ ഭക്ഷണം, കൃത്രിമഭക്ഷണപദാര്‍ത്ഥങ്ങള്‍ തുടങ്ങിയവയും ഒഴിവാക്കാന്‍ ശ്രമിക്കുക.
5. അന്യരെ നിന്ദിക്കുക, ദ്വേഷിക്കുക, വഞ്ചിക്കുക തുടങ്ങിയവ ഒഴിവാക്കുക. ഇപ്രകാരം ചെയ്യുന്നവന്‍ സ്വയം നശിച്ചു പോകുന്നു. പരമാവധി സത്യം പറയുവാന്‍ ശ്രമിക്കുക. പരസ്ത്രീകളെ കാംക്ഷിക്കാതിരിക്കുക. അന്യായമായ രീതിയില്‍ ധനം സമ്പാദിക്കാന്‍ ശ്രമിക്കാതിരിക്കുക, മാത്സര്യത്തെയും ദുരഭിമാനത്തെയും വെടിയുക തുടങ്ങിയവയെല്ലാം കലിദോഷമുക്തിയെ പ്രദാനം ചെയ്യുന്നവയാണ്.
6. കഴിയുമെങ്കില്‍ ആഴ്ചയില്‍ ഒരു ദിവസം ഉപവാസം അനുഷ്ഠിക്കുക. ഇതു മൂലം മനസ്സും ശരീരവും
ശുദ്ധമായിത്തീരുന്നു.
7. മുതിര്‍ന്നവരെയും പൂജ്യരെയും ആദരിക്കുക. തന്റെ കഴിവിനനുസരിച്ച് ദാനം ചെയ്യുവാന്‍ ശീലിക്കുക.
8. നെറ്റിയില്‍ ഭസ്മമോ ചന്ദനമോ കുങ്കുമമോ ധരിക്കാന്‍ ശീലിക്കുക. പതിവായി ഇവ ധരിക്കുന്നതുകൊണ്ട് മുഖപ്രസാദം വര്‍ദ്ധിക്കുന്നു. ചന്ദനം ധരിക്കുന്നതുകൊണ്ട് കലിദോഷമുക്തി സിദ്ധിക്കുമെന്ന് മേല്‍പ്പുത്തൂര്‍ തന്നെ നാരായണീയത്തില്‍ പറഞ്ഞിട്ടുണ്ട്.
4. ആഴ്ചയില്‍ ഒരു തവണയെങ്കിലും ക്ഷേത്രദര്‍ശനം നടത്തുക. ഈശ്വരദര്‍ശനത്തിനുവേണ്ടിയാവണം ക്ഷേത്രദര്‍ശനം നടത്തുന്നത്. അല്ലാതെ സ്വന്തം കാര്യം സാധിക്കാന്‍ വേണ്ടി മാത്രമാകരുത്. അങ്ങിനെ ദര്‍ശനം നടത്തുകയാണെങ്കില്‍ കാര്യമായ ഫലമൊന്നും സിദ്ധിക്കില്ല.
10. പുരാണങ്ങള്‍, ഇതിഹാസങ്ങള്‍, മറ്റ് ആദ്ധ്യാത്മികഗ്രന്ഥങ്ങള്‍ തുടങ്ങിയവ പഠിക്കുകയും അവയുടെ ആന്തരികാര്‍ത്ഥത്തെ മനനം ചെയ്യുകയും ചെയ്യുക. ഇതിഹാസ പുരാണങ്ങള്‍ മനുഷ്യമനസ്സിലെ എല്ലാവിധ മാലിന്യങ്ങളെയും നീക്കി ശാന്തിയെ പ്രദാനം ചെയ്യുന്നവയാണ്. ആരംഭത്തില്‍ അവ പഠിക്കുന്നത് പ്രയാസകരമായി തോന്നിയേക്കാമെങ്കിലും സ്ഥിരമായ അദ്ധ്യയനത്തിലൂടെ വളരെ ലളിതങ്ങളായി അനുഭവപ്പെടും. അതേപോലെതന്നെ ‘ഹരേരാമ’ എന്നാരംഭിക്കുന്ന കലിസന്തരണമന്ത്രവും, ‘ഓം നമോ നാരായണായ’ എന്ന അഷ്ടാ ക്ഷരമന്ത്രവും ‘ഓം നമോ ഭഗവതേ വാസുദേവായ’ എന്ന ദ്വാദശാക്ഷരമന്ത്ര വും, ‘ഓം നമഃ ശിവായ’ എന്ന പഞ്ചാക്ഷരമന്ത്രവും കഴിവിനനുസരിച്ച് ജപിക്കാന്‍ ശീലിക്കുക. ഇവയിലേതെങ്കിലും പതിവായി ജപിക്കുകയാണെ ങ്കില്‍തന്നെ വളരെ വേഗത്തില്‍ മനശാന്തി കൈവരുന്നതായി കാണാവുന്ന താണ്. പരമാവധി ശ്രദ്ധയോടും ഭക്തിയോടും കൂടി ഈശ്വരഭജനം നടത്തുക. എത്രത്തോളം ശ്രദ്ധയുണ്ടോ അത്രത്തോളം ഫലവും സിദ്ധിക്കും.
(കല്ക്കിപുരാണത്തില്‍ നിന്ന്)
