തിരുവനന്തപുരം:വിജിലന്സ് കേസില് കോടതി ശിക്ഷിച്ചതിന് പിന്നാലെ ഒളിവില് പോയ കെഎസ്ഇബി ജീവനക്കാരന് പിടിയില്. വിതുര, തൊളിക്കോട് കെഎസ്ഇബി സബ് എന്ജിനീയര് ഓഫീസിലെ കാഷ്യര് സക്കീര് ഹുസൈനെയാണ് വിജിലന്സ് തിരുവനന്തപുരം യൂണിറ്റ് പിടികൂടിയത്. 2004 ല് ഉപഭോക്താക്കളില് നിന്നും വൈദ്യുതി നിരക്ക് ഇനത്തില് പിരിച്ചെടുത്ത 1,37,277 രൂപ ബാങ്കില് അടയ്ക്കാതെ തിരിമറി നടത്തിയ കേസിലെ പ്രതിയാണ് ഇയാള്.
സക്കീര് ഹുസൈന് കുറ്റക്കാരനാണെന്ന് കോടതി കണ്ടെത്തി. വിവിധ വകുപ്പുകളിലായി രണ്ട് വര്ഷം കഠിനതടവിനും 2,000 രൂപ പിഴ ഒടുക്കുന്നതിനും 2013 ല് ശിക്ഷ വിധിച്ചു.
പ്രതി ഹൈക്കോടതിയില് അപ്പീല് നല്കിയെങ്കിലും കോടതി അത് നിരസിച്ചു.പിന്നീട് സുപ്രീം കോടതിയെ സമീപിച്ചെങ്കിലും ഹര്ജി തള്ളി.ശിക്ഷ അനുഭവിക്കുന്നതിനായി വിജിലന്സ് കോടതിയില് ഹാജരാകാന് നിര്ദ്ദേശിച്ചെങ്കിലും അങ്ങനെ ചെയ്യാതെ സക്കീര് ഹുസൈന് ഒളിവില് പോവുകയായിരുന്നു.നെടുമങ്ങാട് സ്വദേശിയായ സക്കീര് ഹുസൈനെ ശനിയാഴ്ച രാവിലെ വിജിലന്സ് സംഘം നെടുമങ്ങാട് ചാരുംമൂട്ടില് നിന്നുമാണ് അറസ്റ്റ് ചെയ്തത്.തിരുവനന്തപുരം വിജിലന്സ് കോടതിയില് ഹാജരാക്കിയ പ്രതിയെ കോടതി നടപടികള് പൂര്ത്തിയാക്കിയ ശേഷം തിരുവനന്തപുരം സെന്ട്രല് ജയിലിലടച്ചു.
