ലോകകപ്പ് ഫുട്‌ബോളിന്റെ ചരിത്രത്തില്‍ ആദ്യമായാണ് കാനഡയില്‍ മത്സരം സംഘടിപ്പിക്കാന്‍ തയ്യാറെടുക്കുന്നത്. തലസ്ഥാനമായ ടൊറന്റോയിലും വാന്‍കൂവറിലുമാണ് മത്സരങ്ങള്‍. വാന്‍കൂവറിലെ ബിസി പ്ലേസ് സ്റ്റേഡിയത്തില്‍ ഏഴ് മത്സരങ്ങളാണുള്ളത്. മേല്‍കൂര പൂര്‍ണമായും അടച്ച നിലയിലാണ് ഈ സ്റ്റേഡിയം. കനേഡിയന്‍ ഫുട്‌ബോള്‍ ലീഗ്(സിഎഫ്എല്‍) ടീമായ ബിസി ലയന്‍സിന്റെ ഹോം ഗ്രൗണ്ടാണിത്. 1983ല്‍ പണി തീര്‍ത്ത സ്റ്റേഡിയത്തില്‍ 2010 വിന്റര്‍ ഒളിംപിക്‌സിന്റെയും പാരാലിംപിക്‌സിന്റെയും ഭാഗമായിട്ടുണ്ട്. 2015 വനിതാ ലോകകപ്പില്‍ ക്വാര്‍ട്ടര്‍ ഫൈനല്‍ അടക്കം എട്ട് മത്സരങ്ങള്‍ ഇവിടെ നടന്നിട്ടുണ്ട്. കഴിഞ്ഞ വര്‍ഷത്തെ കോന്‍കകാഫ് ഗോള്‍ഡ് കപ്പില്‍ കാനഡ-ഹോണ്ടുറാസ് മത്സരത്തിനും വേദിയായി.
ഒന്റാരിയോ പ്രവിശ്യയിലെ ടൊറന്റോയിലുള്ള ബിഎംഒ ഫീല്‍ഡ് സ്റ്റേഡിയത്തില്‍ ലോകകപ്പിലെ ആറ് മത്സരങ്ങള്‍ നടക്കും. 2007ലായിരുന്നു ഇതിന്റെ നിര്‍മാണം പൂര്‍ത്തിയാക്കപ്പെട്ടത്. അക്കൊല്ലം ഫിഫ അണ്ടര്‍ 20 ഫുട്‌ബോള്‍ ലോകകപ്പിലെ 12 മത്സരങ്ങള്‍ ഇവിടെയാണ് നടന്നത്. ചെക്ക് റിപ്പബ്ലിക്കിനെ തോല്‍പ്പിച്ച് അര്‍ജന്റീന കിരീടം നേടിയ ഫൈനലും ഇതേ വേദിയിലായിരുന്നു. പിന്നീട് 2014 വനിതാ ലോകകപ്പിലെ ക്വാര്‍ട്ടര്‍ അടക്കമുള്ള ഏഴ് മത്സരങ്ങള്‍ക്ക് വേദിയായി. 2015ലും 2023ലെയും കോന്‍കകാഫ് ഗോള്‍ഡ് കപ്പിലെ കാനഡയുടെ ഓരോ മത്സരങ്ങളും ഇവിടെ നടന്നിട്ടുണ്ട്.
ബിസി പ്ലേസിലെ മത്സരങ്ങള്‍
ജൂണ്‍ 13: ഓസ്‌ട്രേലിയ-തുര്‍ക്കി(ഗ്രൂപ്പ് ഡി)
ജൂണ്‍ 18: കാനഡ-ഖത്തര്‍(ഗ്രൂപ്പ് ബി)
ജൂണ്‍ 21: ന്യൂസിലന്‍ഡ്-ഈജിപ്ത്(ഗ്രൂപ്പ് ജി)
ജൂണ്‍ 24: സ്വിറ്റ്‌സര്‍ലന്‍ഡ്-കാനഡ(ഗ്രൂപ്പ് ബി)
ജൂണ്‍ 26: ന്യൂസിലന്‍ഡ്-ബെല്‍ജിയം(ഗ്രൂപ്പ് ജി)
ജൂലൈ 2: റൗണ്ട് ഓഫ് 32
ജൂലൈ 7: പ്രീക്വാര്‍ട്ടര്‍
ബിപിഒ ഫീല്‍ഡിലെ മത്സരങ്ങള്‍
ജൂണ്‍ 12: കാനഡ-ബോസ്‌നിയ(ഗ്രൂപ്പ് ബി)
ജൂണ്‍ 17: ഘാന-പാനമ(ഗ്രൂപ്പ് എല്‍)
ജൂണ്‍ 20: ജര്‍മനി-ഐവറി കോസ്റ്റ്(ഗ്രൂപ്പ് ഇ)
ജൂണ്‍ 23: പാനമ-ക്രൊയേഷ്യ(ഗ്രൂപ്പ് എല്‍)
ജൂണ്‍ 26: സെനഗല്‍-ഇറാഖ്(ഗ്രൂപ്പ് ഐ)
ജൂലൈ 2: റൗണ്ട് ഓഫ് 32
