കാലടി: ശ്രീശങ്കരാചാര്യ സംസ്‌കൃത സര്‍വകലാശാലയില്‍ ചട്ടമ്പിസ്വാമിയുടെ ജീവചരിത്ര ഗ്രന്ഥപ്രകാശന വിവാദം സംബന്ധിച്ച് സര്‍വകലാശാല പ്രാഥമിക അന്വേഷണം ആരംഭിച്ചു. ചട്ടമ്പിസ്വാമി സമാധി ദിനത്തോടനുബന്ധിച്ച് പന്മന ആശ്രമത്തില്‍ ഗവര്‍ണര്‍ രാജേന്ദ്ര വിശ്വനാഥ് ആര്‍ലേക്കര്‍ പങ്കെടുത്ത വേദിയില്‍ പ്രകാശനം ചെയ്യേണ്ടതായിരുന്നു ചട്ടമ്പിസ്വാമിയുടെ ജീവചരിത്രഗ്രന്ഥം. എന്നാല്‍ 11 വാള്യങ്ങളുള്ള ജീവചരിത്ര ഗ്രന്ഥത്തിന്റെ നാലു വാള്യങ്ങള്‍ ഒഴികെ ബാക്കിയുള്ള വാള്യങ്ങള്‍ പുറംചട്ട മാത്രമുള്ള പ്രിന്റ് ചെയ്യാത്ത വെള്ളക്കടലാസായത് സംബന്ധിച്ചാണ് അന്വേഷണം ആരംഭിച്ചത്.
സര്‍വകലാശാല പ്രസിദ്ധീകരണ വിഭാഗത്തിലെ സീനിയര്‍ പബ്ലിക്കേഷന്‍ ഓഫീസറോട് ഗ്രന്ഥത്തിന്റെ അച്ചടിയും പ്രകാശനവും സംബന്ധിച്ച മുഴുവന്‍ രേഖകളും ഹാജരാക്കാന്‍ വൈസ്ചാന്‍സലര്‍ ഡോ. സിസാ തോമസ് നിര്‍ദേശം നല്‍കി.
ഗവര്‍ണറെക്കൊണ്ട് ചട്ടമ്പിസ്വാമികളുടെ ഡമ്മി ജീവചരിത്ര ഗ്രന്ഥം പ്രകാശനം ചെയ്യിപ്പിക്കാന്‍ നടത്തിയ നീക്കത്തെക്കുറിച്ച് അന്വേഷണം നടത്തണമെന്ന് ആവശ്യപ്പെട്ട് ഗവര്‍ണര്‍ക്കും വിസിക്കും ലഭിച്ച പരാതികളുടെ അടിസ്ഥാനത്തിലാണ് പ്രസിദ്ധീകരണ വിഭാഗത്തോട് ഗ്രന്ഥ അച്ചടി സംബന്ധിച്ച ഫയലുകള്‍ ഹാജരാക്കാന്‍ വിസി ആവശ്യപ്പെട്ടത്.
സര്‍വകലാശാല പ്രസിദ്ധീകരണ വിഭാഗത്തിന്റെയും ചട്ടമ്പി സ്വാമിയുടെ ജീവചരിത്ര ഗ്രന്ഥത്തിന്റയും പ്രസിദ്ധീകരണ ചുമതല സീനിയര്‍ പബ്ലിക്കേഷന്‍ ഓഫീസര്‍ ഡോ. ലിസി മാത്യുവിനായിരുന്നു. കഴിഞ്ഞ ദിവസം നടന്ന ചട്ടമ്പിസ്വാമിയുടെ സമാധി ദിനത്തില്‍ പന്മന ആശ്രമത്തില്‍ നടക്കുന്ന ചടങ്ങിന്റെ ഭാഗമായി കൃതികള്‍ അച്ചടി പൂര്‍ത്തിയാക്കി വില്‍പനക്ക് എത്തിക്കാന്‍ കഴിയുമെന്ന് സിന്‍ഡിക്കേറ്റില്‍ റിപ്പോര്‍ട്ട് ചെയ്തതിനെ തുടര്‍ന്ന് സിന്‍ഡിക്കേറ്റ് ഡോ. ലിസി മാത്യുവിന്റെ പ്രവര്‍ത്തനത്തില്‍ സന്തുഷ്ടി രേഖപ്പെടുത്തിയിരുന്നു. എന്നാല്‍ ഇവരുടെ നടപടി കബളിപ്പിക്കലായിരുന്നുവെന്നാണ് ഇപ്പോള്‍ വിലയിരുത്തുന്നത്. പബ്ലിക്കേഷന്‍ വിഭാഗത്തില്‍ നിന്നുള്ള രേഖകളും റിപ്പോര്‍ട്ടും ലഭിച്ചാലുടന്‍ വിസി ഗവര്‍ണര്‍ക്ക് റിപ്പോര്‍ട്ട് നല്‍കും.
