മലപ്പുറം:പെട്രോള്‍ പമ്പ് ജീവനക്കാരിയെ യുവാവ് ക്രൂരമായി മര്‍ദ്ദിച്ചു.പാലേമാട് ആണ് സംഭവം. ബൈക്കില്‍ പെട്രോള്‍ അടിച്ചതിന്റെ പണം ചോദിച്ചതിനാണ് യുവാവ് ജീവനക്കാരിയെ മര്‍ദിച്ചത്.
പരിക്കേറ്റ് പാലേമാട് സ്വദേശി റോസമ്മയെ എടക്കരയിലെ സ്വകാര്യ ആശുപത്രിയില്‍ പ്രവേശിപ്പിച്ചു. എടക്കര പാലേമാടുള്ള പെട്രോള്‍ പമ്പില്‍ എത്തിയ യുവാവിന് ബൈക്കില്‍ പെട്രോളടിച്ച് നല്‍കിയ റോസമ്മ പണം ആവശ്യപ്പെട്ടു.എന്നാല്‍ പണം നല്‍കാതെ ഇയാള്‍ റോസമ്മയെ അസഭ്യം പറഞ്ഞു എന്നാണ് പെട്രോള്‍ പമ്പ് അധികൃതര്‍ പറയുന്നത്. ഇതോടെ വാക്കേറ്റം രൂക്ഷമാവുകയും തുടര്‍ന്ന് യുവാവ് റോസമ്മയെ മര്‍ദ്ദിക്കുകയുമായിരുന്നു.
പമ്പിലെ മറ്റു ജീവനക്കാര്‍ ഓടിയെത്തി യുവാവിനെ പിടിച്ചു മാറ്റി.കഴുത്തിന് പരിക്കേറ്റ റോസമ്മയെ ആശുപത്രിയില്‍ പ്രവേശിപ്പിച്ചു.സംഭവത്തില്‍ വഴിക്കടവ് സ്വദേശി ജാബിറിനെതിരെ എടക്കര പൊലീസ് കേസെടുത്തു.
