ചേര്‍ത്തല: വിഷുദിനത്തില്‍ ഉണ്ണിക്കണ്ണനെ അവഹേളിക്കുന്ന തരത്തില്‍ സമൂഹ മാധ്യമങ്ങളില്‍ മെഹര്‍ എന്ന ചേര്‍ത്തലയിലെ സ്ഥാപനം പുറപ്പെടുവിച്ച പരസ്യ രൂപേണയുള്ള അവഹേളനം നിസാരമായി തള്ളിക്കളയേണ്ട ഒന്നല്ലെന്ന് ബിഡിജെഎസ് സംസ്ഥാന പ്രസിഡന്റ് തുഷാര്‍ വെള്ളാപ്പള്ളി പ്രസ്താവനയില്‍ അറിയിച്ചു. കഴിഞ്ഞ കുറച്ച് നാളുകളായി സമാധാന അന്തരീക്ഷത്തിന് മുറിവേല്‍പ്പിക്കുന്ന തരത്തില്‍ മുദ്രാവാക്യങ്ങളുടെ രൂപത്തിലും ഇപ്പോള്‍ പരസ്യ രൂപേണയും ഒരു സമൂഹത്തെ കരിവാരിത്തേച്ച് കാണിക്കുന്ന ഹീനമായ അവഹേളനമാണ് അരങ്ങേറിയിട്ടുള്ളത്.
ഇതില്‍ പ്രതിഷേധിച്ച് ബിഡിജെഎസ് ആലപ്പുഴ ജില്ലാ കമ്മിറ്റിയുടെ നേതൃത്വത്തില്‍ നടന്ന പ്രതിഷേധ ജ്വാലയില്‍ പങ്കെടുത്ത സംസ്ഥാന ജനറല്‍ സെക്രട്ടറി അഡ്വ. പി.എസ്. ജ്യോതിസിനും ജില്ല ജനറല്‍ സെക്രട്ടറി കെ.ആര്‍.രൂപേഷിനുമെതിരെ പോലീസ്, പ്രതികള്‍ക്ക് എതിരെ ചുമത്തിയ അതേ വകുപ്പുകള്‍ ചുമത്തി കേസ് രജിസ്റ്റര്‍ ചെയ്തത് തെറ്റിനെ ന്യായീകരിക്കുന്നതിന് തുല്യമായ പ്രവര്‍ത്തിയായി കാണേണ്ടിവരും.
കുറ്റക്കാരെ ശിക്ഷിക്കുന്നതിന് പകരം കുറ്റവാളികളെ ചൂണ്ടിക്കാണിച്ചവരെ ശിക്ഷിക്കുന്ന പോലീസ് നടപടി അതിശയകരവും ലജ്ജാകരവുമാണ്. നീതിന്യായ വ്യവസ്ഥയോടുള്ള വെല്ലുവിളിയായി ഇതിനെ കാണേണ്ടിവരും. പോലീസ് ഇക്കാര്യത്തില്‍ നീതി നിര്‍വഹണം നടത്തണം. അല്ലാത്തപക്ഷം ശക്തമായ പ്രതിഷേധ നടപടികളുമായി ബിഡിജെഎസ് സംസ്ഥാന വ്യാപകമായി പ്രതിഷേധ ജ്വാലകള്‍ സംഘടിപ്പിക്കുമെന്നും തുഷാര്‍ വെള്ളാപ്പള്ളി അറിയിച്ചു.
