തിരുവനന്തപുരം: വനിതാ സംവരണ ബില്‍ പരാജയപ്പെടുത്തിയ ഇടതു വലതു മുന്നണികള്‍ സ്ത്രീസമൂഹത്തെ മാത്രമല്ല കേരളത്തേയും വഞ്ചിച്ചതായി ബി ജെ പി സംസ്ഥാന ജനറല്‍ സെക്രട്ടറി അഡ്വ.എസ്. സുരേഷ്. പത്ത് വനിതാ എംപിമാരെ കേരളത്തിന് ലഭിക്കേണ്ടതായിരുന്നു. എന്നാല്‍ ബില്‍ പാസാക്കാതിരുന്നതോടെ മണ്ഡലപുനര്‍നിര്‍ണയത്തില്‍ കേരളത്തിലെ ലോക്‌സഭാ സീറ്റുകള്‍ 15 ആയി കുറയുന്ന സ്ഥിതി സംജാതമായെന്നും അഡ്വ എസ് സുരേഷ് പറഞ്ഞു. ബിജെപി തിരുവനന്തപുരം സിറ്റി ജില്ലാ കമ്മിറ്റി സംഘടിപ്പിച്ച പതിനഞ്ചാമത് ബി കെ ശേഖര്‍ അനുസ്മരണ ചടങ്ങ് ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
ബി ജെ പി- മോദി വിരുദ്ധതയുടെ തിമിരം ബാധിച്ച കേരളത്തിലെ ഇടതു വലത് എംപിമാര്‍ കേരളത്തിലെ ജനങ്ങളോട് വലിയ ക്രൂരതയാണ് കാണിച്ചത്. ഒരു ഉത്തമ രാഷ്‌ട്രീയ പ്രവര്‍ത്തകനായിരുന്ന ബി കെ ശേഖറിന്റെ പ്രവര്‍ത്തനങ്ങള്‍ പില്‍ക്കാലത്തെ ബിജെപി യുടെ വിജയങ്ങള്‍ക്കുള്ള അടിത്തറ ആയിരുന്നു. കേരളത്തിലെ ബിജെപിയുടെ മുഖമായിരുന്നു ബി.കെ.ശേഖര്‍ എന്നും അദ്ദേഹത്തിന്റെ വേര്‍പാട് പാര്‍ട്ടിക്ക് നികത്താനാവാത്ത നഷ്ടമാണെന്നും അഡ്വ.എസ്. സുരേഷ് കൂട്ടിച്ചേര്‍ത്തു.ബിജെപി സംസ്ഥാന ഉപാദ്ധ്യക്ഷനും തിരുവനന്തപുരം ജില്ലാ അദ്ധ്യക്ഷനുമായിരുന്ന ബി കെ ശേഖര്‍ വിദ്യാര്‍ത്ഥി കാലം മുതല്‍ക്കേയുള്ള തന്റെ മാതൃകാ നേതാവാണന്ന് തിരുവനന്തപരം നഗരസഭാ മേയര്‍ വി വി രാജേഷ് പറഞ്ഞു.
ബിജെപി തിരുവനനന്തപുരം സിറ്റി ജില്ലാ ആഫിസിലെ ഹാള്‍ നവീകരിച്ച് ബി കെ ശേഖര്‍ മെമ്മോറിയല്‍ ഹാള്‍ എന്ന് നാമകരണം ചെയ്യുമെന്ന് ചടങ്ങില്‍ അദ്ധ്യക്ഷനായിരുന്ന ബിജെപി സിറ്റി ജില്ലാ അദ്ധ്യക്ഷന്‍ കരമന ജയന്‍ അറിയിച്ചു.ബി കെ ശേഖറിന്റെ മകള്‍ അഡ്വ. ഗൗരി കല്യാണി ശേഖര്‍, ആദ്യകാല ബിജെപി കൗണ്‍സിലര്‍മാരായ പി അശോക് കുമാര്‍, വെങ്കിട്ടരാമന്‍, നേതാക്കളായ കരമന അജിത്ത്, എം ആര്‍ ഗോപന്‍, പാപ്പനംകോട് സജി, ശ്രീവരാഹം വിജയന്‍ തുടങ്ങിയവരും പ്രസംഗിച്ചു
