ആലപ്പുഴ : ഭാര്യയെയും പ്രായപൂര്‍ത്തിയാകാത്ത മകളെയും ക്രൂരമായി മര്‍ദിച്ച കേസില്‍ അമ്പലപ്പുഴ പുതുവല്‍ സ്വദേശി സിബിമോനെതിരെ അമ്പലപ്പുഴ പൊലീസ് കേസെടുത്തു. ഭാര്യ നിഷമോള്‍ (39), മകള്‍ നന്ദ (16)എന്നിവരെയാണ് മര്‍ദിച്ചത്.
ഏപ്രില്‍ 15ന് രാത്രി 10.30നും 11നും ഇടയിലാണ് സംഭവം.കഠിനമായ ചൂട് കാരണം രാത്രിയില്‍ മുറിയില്‍നിന്ന് ഇറങ്ങി വീടിന്റെ മുറ്റത്ത് തുണി വിരിച്ച് കിടന്നതിനായിരുന്നു മര്‍ദനമെന്ന് എഫ്‌ഐആറില്‍ പറയുന്നു. അസഭ്യവാക്കുകള്‍ പറഞ്ഞ് അധിക്ഷേപിച്ചെന്നും എഫ്‌ഐആറിലുണ്ട്.
ഭാര്യ നിഷമോളുടെ നടുവില്‍ ചവിട്ടി, മുടിയില്‍ പിടിച്ചു വലിച്ച് മുഖത്ത് ക്രൂരമായി കൈവീശി അടിച്ചു. മര്‍ദനം തടയാന്‍ എത്തിയ മകള്‍ നന്ദയെ പ്രതി അസഭ്യം പറയുകയും കൈകൊണ്ട് പലതവണ അടിക്കുകയും ചെയ്തു എന്നിങ്ങനെയാണ് എഫ് ഐ ആറിലുളളത്.
