പത്തനംതിട്ട: സംസ്ഥാന സര്ക്കാരിന്റെ കെടുകാര്യസ്ഥതയും അനാസ്ഥയും മൂലം വിഴിഞ്ഞം തുറമുഖത്തോട് ചേര്ന്ന് പ്രഖ്യാപിച്ച വന് വ്യവസായ സംരംഭങ്ങള് വിഴിഞ്ഞം വിടാന് ഒരുങ്ങുന്നു. ദുബായ് ആസ്ഥാനമായ ഒരു പ്രമുഖ കമ്പനി ഇന്വെസ്റ്റ്മെന്റ് കേരളയില് പ്രഖ്യാപിച്ച 5000 കോടി രൂപയുടെ പ്രൊജക്ട് ഇപ്പോള് അനിശ്ചിതത്വത്തിലാണ്. വ്യാവസായിക ആവശ്യങ്ങള്ക്ക് ഭൂമി ലഭിക്കാതായതോടെ വിഴിഞ്ഞം തുറമുഖത്തോടനുബന്ധിച്ച് വമ്പന് നിക്ഷേപം നടത്താന് ലക്ഷ്യമിട്ട് എത്തിയ നിരവധി വിദേശ സംരംഭകര് ഉള്പ്പെടെ ഇപ്പോള് ആശങ്കയിലാണ്. വിഴിഞ്ഞെത്ത് ഭൂമി ഏറ്റെടുക്കുന്നതില് സര്ക്കാര് പരാജയപ്പെട്ടതാണ് നിക്ഷേപകര്ക്ക് തിരിച്ചടിയാകുന്നത്.
തുറമുഖത്തോട് ചേര്ന്ന് ഭൂമി കിട്ടാതായതോടെ നിക്ഷേപകര് പലരും തമിഴ്നാട്ടിലേക്ക് മാറാന് തയ്യാറെടുക്കുകയാണ്. സ്ഥലം ഏറ്റെടുത്ത് നല്കുന്നതില് പിണറായി സര്ക്കാര് പരാജയപ്പെട്ടതോടെ സ്വന്തം നിലയില് പല കമ്പനികളും ഭൂമി കണ്ടെത്താന് ശ്രമിച്ചിരുന്നു. നെയ്യാറ്റിന്കര മേഖലയില് സ്ഥലം വാങ്ങാന് ഭൂ ഉടമകളുമായി ചിലര് ധാരണയായെങ്കിലും ഇതുവരെ ഭൂമി രജിസ്ട്രേഷന് നടന്നിട്ടില്ല. ഇടനിലക്കാര് ഭൂമിക്ക് ഉയര്ന്ന വില ആവശ്യപ്പെടുന്നതാണ് പ്രതിസന്ധിയാകുന്നത്.
പല കമ്പനികള്ക്കും വ്യവസായ വകുപ്പ് മറ്റ് ജില്ലകളില് ഭൂമി വാഗ്ദാനം ചെയ്തിരുന്നു. എന്നാല് തുറമുഖാധിഷ്ഠിത വ്യവസായങ്ങളായതിനാല് വിഴിഞ്ഞത്ത് തന്നെ ഭൂമി വേണം എന്നാണ് നിക്ഷേപകരുടെ നിലപാട്. തുറമുഖത്തോട് ചേര്ന്ന് റെയില്, റോഡ് കണക്ടിവിറ്റി ഉള്ള ഭൂമിയാണ് ആവശ്യം. ഇത്തരത്തിലുള്ള സ്ഥലം ഏറ്റെടുക്കുന്നതിന് വിഴിഞ്ഞം ഇന്റര്നാഷണല് സീ പോര്ട്ട് ലിമിറ്റഡ് ശ്രമം നടത്തിയെങ്കിലും അതും ഫലവത്തായില്ല.
ജന്മഭൂമി ഓണ്ലൈന്