ഉപ്പുകല്ലും ഉപ്പുനീരും നെഗറ്റീവ് എനർജിയെ തുരത്തുമെന്ന് ഒരു വിശ്വാസമുണ്ട്. ഉപ്പു ചേർത്ത വെള്ളത്തിൽ കുളിക്കുന്നതും വീട്ടിൽ പലയിടങ്ങളിലായി പല രൂപത്തിൽ ഉപ്പു സൂക്ഷിക്കുന്നതും വളരെ ഗുണം ചെയ്യുമെന്നും പറയപ്പെടുന്നുണ്ട്.
വീട് അടച്ചിട്ട് ദിവസങ്ങളോളം മാറി നിന്നിട്ടു തിരിച്ചെത്തുമ്പോൾ വീടിനുള്ളിൽ പരിചിതമല്ലാത്ത ഗന്ധമുണ്ടാകും. അന്തരീക്ഷത്തിലെ മാലിന്യങ്ങളും പൊടിപടലങ്ങളും വായുസഞ്ചാരമില്ലാത്തതുമെല്ലാം ഇതിനു കാരണമാകാം. ഈ സാഹചര്യത്തിൽ അൽപം ഉപ്പു ചേർത്ത വെള്ളം കൊണ്ട് വീടു വൃത്തിയാക്കാം. അണുക്കൾ നശിക്കുമെന്നു മാത്രമല്ല ഏതെങ്കിലും തരം നെഗറ്റീവ് എനർജിയുടെ സാന്നിധ്യമുണ്ടെങ്കിൽ അത് ഉപ്പുവെള്ളം ആഗിരണം ചെയ്യുകയും ചെയ്യും.
പുറത്തുപോയി വരുമ്പോൾ അകാരണമായി ക്ഷീണം തോന്നാറുണ്ടോ? ശരീരത്തിലെ ഊർജം വല്ലാതെ ചോർന്നു പോകുന്നതായി തോന്നുന്നുണ്ടോ? എങ്കിൽ തീർച്ചയായും ഒരു കുളി അത്യാവശ്യമാണ്. ഉപ്പു ചേർത്ത വെള്ളത്തിൽ അസ്സലൊരു കുളി പാസാക്കിയാൽ ക്ഷീണം പമ്പ കടക്കും. അപരിചിതമായ സ്ഥലങ്ങളിലെ സഞ്ചാരമോ ആളുകളോ അറിഞ്ഞോ അറിയാതെയോ നിങ്ങളിൽ കടത്തി വിടുന്ന നെഗറ്റീവ് എനർജിയിൽ നിന്നു മുക്തി നേടാൻ ഈ ഉപ്പുവെള്ളത്തിലുള്ള കുളി സഹായിക്കും.
ശരീരത്തിൽ നിന്നും വീട്ടിൽ നിന്നും നെഗറ്റീവ് എനർജിയെ തുരത്താൻ ഉപ്പുകല്ലാണോ ഉപ്പുവെള്ളമാണോ ഉപയോഗിക്കേണ്ടത് എന്ന സംശയം പലർക്കുമുണ്ടാകും. വീട് വൃത്തിയാക്കാനും കുളിക്കാനും ഉപ്പുകല്ലിട്ട വെള്ളം ഉപയോഗിച്ചാൽ മതി.
വീടിന്റെ നാലു മൂലകളിൽ സൂക്ഷിക്കാൻ നല്ലത് ഉപ്പുവെള്ളമാണ്. ഇങ്ങനെ പാത്രത്തിൽ സൂക്ഷിക്കുന്ന ഉപ്പുവെള്ളം ദിവസവും മാറ്റാൻ ശ്രദ്ധിക്കണം. ഉപ്പുകല്ലാണ് ഈ വിധം സൂക്ഷിക്കുന്നതെങ്കിൽ അതു മൺപാത്രത്തിലോ തടിപ്പാത്രത്തിലോ ആയിരിക്കാനും പ്രത്യേകം ശ്രദ്ധിക്കണം. ഈ വിധമുള്ള ഉപയോഗശേഷം ഉപ്പ് വെള്ളമോ കല്ലുപ്പോ വെറുതെ വെളിയിലേക്ക് എറിഞ്ഞു കളയുകയോ വീണ്ടുമെടുത്ത് വീട്ടാവശ്യത്തിന് ഉപയോഗിക്കുകയോ ചെയ്യരുത്. വെള്ളത്തിൽ കലർത്തി ശുചിമുറിയിലോ അടുക്കളയിലെ സിങ്കിലോ ഒഴിച്ചു കളയണം.
ഉപയോഗശൂന്യമായ ഒരുപാടു വസ്തുക്കൾ എല്ലാ വീട്ടിലും കാണും. ഷെൽഫിലിരിക്കുന്ന സമ്മാനങ്ങൾ മുതൽ അലങ്കാരവസ്തുക്കൾ വരെ അതിൽപെടും. ഉപ്പുവെള്ളത്തിൽ മുക്കിയ തുണിയുപയോഗിച്ച് ഇടയ്ക്കിടെ അത്തരം വസ്തുക്കൾ വൃത്തിയാക്കാൻ ശ്രദ്ധിക്കണം. മറ്റൊരാൾ ഉപയോഗിച്ച ഉപ്പിന്റെ ബാക്കി ഒരിക്കലും ഉപയോഗിക്കാതിരിക്കാനും ശ്രദ്ധിക്കണം.
