ഗുരുവായൂര്‍: പ്രസാദം വാങ്ങുന്നതിനുള്ള കണ്ടെയ്‌നര്‍ ക്ഷാമം ഗുരുവായൂരില്‍ രൂക്ഷമായതോടെ ഭക്തജനങ്ങള്‍ ബുദ്ധിമുട്ടിലായി. പാല്‍ പായസം ഉള്‍പ്പെടെ നിശ്ചിത അളവില്‍ പ്രസാദം ലഭിക്കണമെങ്കില്‍ ഭക്തര്‍ക്ക് വലിയ ബുദ്ധിമുട്ട് നേരിടേണ്ടിവരുന്നുവെന്ന് ഗുരുവായൂര്‍ ഭക്തജന കൂട്ടായ്‌മ ആരോപിച്ചു. ക്ഷേത്രപരിസരത്ത് പ്രവര്‍ത്തിച്ചിരുന്ന കണ്ടെയ്‌നര്‍ കൗണ്ടര്‍ ഇപ്പോള്‍ പ്രവര്‍ത്തനരഹിതമാണ്. ഇതോടെ ക്ഷേത്രത്തില്‍ എത്തുന്ന ഭക്തജനങ്ങള്‍ പുറത്തുള്ള വ്യാപാരികളില്‍ നിന്ന് വലിയ വില നല്‍കി കണ്ടെയ്‌നര്‍ വാങ്ങേണ്ട സാഹചര്യമാണ്.
ഇതിനുമുമ്പ് പ്രസാദ കൗണ്ടറിനോടൊപ്പം തന്നെ കണ്ടെയ്‌നര്‍ കൗണ്ടറും പ്രവര്‍ത്തിച്ചിരുന്നതിനാല്‍ ഭക്തജനങ്ങള്‍ക്ക് എളുപ്പത്തില്‍ ആവശ്യമായ കണ്ടെയ്‌നറുകള്‍ ലഭിച്ചിരുന്നു. എന്നാല്‍ ഈ സൗകര്യം നിര്‍ത്തലാക്കിയതോടെ പലരും പ്രസാദം വാങ്ങാതെ മടങ്ങിപ്പോകേണ്ട അവസ്ഥയാണ്. ടിന്നുകളില്‍ പ്രസാദം ലഭ്യമാണെന്ന വാദമുണ്ടെങ്കിലും ആവശ്യത്തിന് ലഭ്യമാകാത്തതിനാല്‍ അത് പര്യാപ്തമല്ലെന്നാണ് ഭക്തജനങ്ങളുടെ പ്രതികരണം. പ്രത്യേകിച്ച് തിരക്കേറിയ ദിവസങ്ങളില്‍ പ്രശ്‌നം കൂടുതല്‍ രൂക്ഷമാകുന്നുവെന്നും പരാതി ഉയരുന്നു.
കണ്ടെയ്‌നര്‍ കൗണ്ടര്‍ അടിയന്തരമായി പുനസ്ഥാപിക്കുകയോ അല്ലെങ്കില്‍ പ്രസാദ കൗണ്ടറില്‍ നിന്നുതന്നെ കണ്ടെയ്‌നര്‍ ലഭ്യമാക്കുന്നതിനുള്ള സംവിധാനം ഏര്‍പ്പെടുത്തുകയോ ചെയ്യണമെന്ന് ഗുരുവായൂര്‍ ഭക്തജന കൂട്ടായ്‌മ ആവശ്യപ്പെട്ടു.
