തൃശൂര്: വരവൂര് ഗവ. ഹയര് സെക്കന്ഡറി സ്കൂളിലെ വിദ്യാര്ത്ഥിയെ ചൂരലിന് അടിക്കുന്ന വീഡിയോ ദൃശ്യം പുറത്തുവന്നതോടെ തെറ്റ് ഏറ്റുപറഞ്ഞ് അദ്ധ്യാപകന് മണികണ്ഠന് സോഷ്യല്മീഡിയ ലൈവില് വന്നു. ആ തെറ്റിലേക്ക് നയിച്ച സംഭവങ്ങള് കൂടി നിങ്ങള് അറിയണമെന്ന് കാഴ്ച പരിമിതിയുള്ള അദ്ദേഹം അഭ്യര്ത്ഥിക്കുന്നു. ഞാന് ക്ലാസ് എടുത്തുകൊണ്ടിരിക്കുകയായിരുന്നു. അതിനിടെ ഒരു ടീച്ചര് വാതിലില് തട്ടുന്നു. കുട്ടികള്ക്ക് മെസ്സേജ് കൊടുക്കാനാണ് ടീച്ചര് വന്നത്. എന്താടാ മേശപ്പുറത്തിരിക്കുന്നത് എന്നു ചോദിച്ചുകൊണ്ടാണ് ടീച്ചര് വന്നത്. ഒരു കുട്ടി മേശപ്പുറത്ത് കയറിയിരിക്കുന്നത് എനിക്ക് അത്രയും വിഷമമായി. എനിക്ക് പെട്ടെന്നുണ്ടായ പ്രകോപനത്തിലാണ് ഞാന് ചെയ്യാന് പാടില്ലാത്തത് ചെയ്തത്. ഒരിക്കലും വൈരാഗ്യ ബുദ്ധിയോടെ അല്ല. എനിക്കുണ്ടായ വിഷമങ്ങള് മനസ്സിലാക്കണം. കാഴ്ച പരിമിതിയുള്ള ആളാണ് താനെന്നും ഇത്രയും കുട്ടികളുള്ള ക്ലാസില് എന്നെ കോമാളിക്ക് തുല്യമായിട്ടാണ് കുട്ടികള് കണ്ടതെന്നും അദ്ദേഹം പറയുന്നുണ്ട്.
വിദ്യാര്ത്ഥിയെ അടിക്കുന്ന ദൃശ്യം പിന്നിലിരുന്ന സഹപാഠികളാണ് മൊബൈല് ഫോണില് പകര്ത്തി സോഷ്യല് മീഡിയയില് പ്രചരിപ്പിച്ചത്.
ദൃശ്യം വൈറലായതോടെ സംഭവത്തില് പൊലീസില് പരാതി നല്കുമെന്ന് കുട്ടിയുടെ വീട്ടുകാര് പറഞ്ഞിരുന്നു. സാമൂഹിക ശാസ്ത്രം അദ്ധ്യാപകനാണ് മണികണ്ഠന്.
