കണ്ണൂര്‍ :അഞ്ചരക്കണ്ടി ദന്തല്‍ കോളേജ് വിദ്യാര്‍ത്ഥി നിതിന്‍ രാജിന്റെ മരണത്തില്‍ അധ്യാപകര്‍ക്കെതിരെ കേസെടുത്ത് പൊലീസ്. ഡോ. എംകെ റാം, സംഗീത എന്നിവര്‍ക്കെതിരെയാണ് കേസ്.
കേസില്‍ ആത്മഹത്യാപ്രേരണ കുറ്റവും പട്ടികജാതി പട്ടികവര്‍ഗ അതിക്രമ നിരോധന വകുപ്പും ഉള്‍പ്പെടുത്തിയിട്ടുണ്ടെന്ന് കണ്ണൂര്‍ സിറ്റി പൊലീസ് കമ്മിഷണര്‍ നിതിന്‍ രാജ് അറിയിച്ചു.റാഗിംഗ് പരാതിയും അന്വേഷിക്കുമെന്നും സിറ്റി പോലീസ് കമ്മിഷണര്‍ അറിയിച്ചു.
നിതിന്‍ ലോണ്‍ ആപ്പില്‍ വായ്‌പ എടുത്തിരുന്നു. കോളേജിലെ ടീച്ചറുടെ നമ്പര്‍ ആണ് ഇതിനായി കൊടുത്തത്. ടീച്ചര്‍ക്ക് നിരന്തരം കോള്‍ വന്നതിനെ തുടര്‍ന്ന് അധ്യാപിക പൊലീസില്‍ പരാതി നല്‍കിയിരുന്നു. നിതിന്‍ അധ്യാപികയുടെ നമ്പര്‍ ബോധപൂര്‍വ്വം നല്‍കിയതാണോ ലോണ്‍ ആപ്പ് ചോര്‍ത്തി എടുത്തത് ആണോ എന്ന് അന്വേഷിക്കുമെന്ന് സിറ്റി പൊലീസ് കമ്മീഷണര്‍ പറഞ്ഞു.നിതിന്‍ രാജിന്റേത് ആത്മഹത്യാ എന്നതില്‍ സംശയം ഇല്ല. ആത്മഹത്യാ പ്രേരണയാണ് അന്വേഷിക്കുന്നതെന്ന് കണ്ണൂര്‍ സിറ്റി പൊലീസ് കമ്മിഷണര്‍ വ്യക്തമാക്കി.അന്വേഷണത്തിന് ഏഴ് അംഗ പ്രത്യേക അന്വേഷണ സംഘം രൂപീകരിച്ചു.
അതേസമയം, മകനെ തള്ളിയിട്ട് കൊന്നതാണെന്ന് സംശയമുണ്ടെന്ന് നിതിന്‍ രാജിന്റെ കുടുംബം ആരോപിച്ചു. അഞ്ചരക്കണ്ടി മെഡിക്കല്‍ കോളേജിലെ സുഹൃത്തുക്കള്‍ക്ക് അയച്ച ശബ്ദ സംഭാഷണത്തിലും അധ്യാപകരില്‍ നിന്നുണ്ടായ ദുരനുഭവങ്ങള്‍ വിവരിക്കുന്നുണ്ട് നിതിന്‍ രാജ്.
