കോഴിക്കോട്: കുതിരവട്ടം മാനസികാരോഗ്യ കേന്ദ്രത്തില് നിന്ന് ചാടിപ്പോയി മൂന്ന് മാസത്തിന് ശേഷം കഴിഞ്ഞ ദിവസം മുംബയില് പിടിയിലായ ദൃശ്യ കൊലക്കേസ് പ്രതി വിനീഷ് വിവിധ സ്ഥലങ്ങളില് കഴിഞ്ഞത് ആക്രി പെറുക്കിയാണെന്ന് പൊലീസ്. കല്യാണില് നിന്നുള്ള ദൃശ്യങ്ങളാണ് പ്രതിയെ പിടികൂടാന് സഹായകമായത്. ചാര്ളി എന്ന പേരിലാണ് ഇയാള് ഒളിവില് കഴിഞ്ഞത്. നാനൂറിലധികം സിസിടിവി ദൃശ്യങ്ങള് ശേഖരിച്ചാണ് പൊലീസ് പ്രതിയിലേക്ക് എത്തിയത്.
പ്രതി ഫോണ് ഉപയോഗിക്കാതിരുന്നത് കണ്ടെത്തുന്നതിന് വെല്ലുവിളിയായിരുന്നു.വിദേശത്തേക്ക് മുങ്ങാനും പദ്ധതിയിട്ടിരുന്നു.
ഇക്കഴിഞ്ഞ ഡിസംബര് 29നാണ് മാനസികാരോഗ്യ കേന്ദ്രത്തിന്റെ ശുചിമുറി തുരന്ന് പ്രതി രക്ഷപ്പെട്ടത്. ഇതിനിടെ നാട്ടിലുള്ള ഒരു ബന്ധുവിനെ ഫോണില് ബന്ധപ്പെടാന് വിനീഷ് ശ്രമിച്ചതാണ് ടവര് ലൊക്കേഷന് പൊലീസ് മനസിലാക്കുന്നതിന് കാരണമായത്. എന്നാല് മുംബൈയിലെത്തിയ പൊലീസ് അന്വേഷണം നടത്തിയെങ്കിലും വിനീഷിനെ പിടികൂടാന് കഴിഞ്ഞില്ല.രണ്ട് മാസത്തോളമായി പ്രത്യേക അന്വേഷണ സംഘം മുംബൈയില് അന്വേഷണം നടത്തിവരികയായിരുന്നു.ഇപ്പോള് റെയില്വേ പൊലീസാണ് വിനീഷിനെ പിടികൂടി പൊലീസിന് കൈമാറിയത്.
പ്രണയം നിരസിച്ചതിലുള്ള വൈരാഗ്യത്തില് 2021 ജൂണ് 17 നാണ് വിനീഷ് ദൃശ്യയെ കുത്തിക്കൊന്നത്.തടയാനെത്തിയ സഹോദരിക്കും പരിക്കേറ്റു.ദൃശ്യയുടെ അച്ഛന്റെ കടയ്ക്ക് തീയിട്ട് ശ്രദ്ധ തിരിച്ചതിന് ശേഷം ആയിരുന്നു ക്രൂര കൊലപാതകം.ദൃശ്യയെ കൊലപ്പെടുത്തിയതിന് പിന്നാലെ കുടുംബത്തെയാകെ ഇല്ലാതാക്കുമെന്ന് വിനീഷ് ഭീഷണിപ്പെടുത്തിയിരുന്നു.
