വാഷിങ്ടൺ: താൽക്കാലിക വെടിനിർത്തൽ കരാർ ലംഘിച്ചുവെന്ന ആരോപണത്തെ തുടർന്ന് ഇറാൻ വീണ്ടും ഹോർമുസ് കടലിടുക്ക് അടച്ചതോടെ പശ്ചിമേഷ്യയിൽ സംഘർഷം രൂക്ഷമാകുന്നു. ഇതിനെതിരെ ശക്തമായ മുന്നറിയിപ്പുമായി ഡോണൾഡ് ട്രംപ് രംഗത്തെത്തി. കരാർ വ്യവസ്ഥകൾ പൂർണമായും പാലിക്കുന്നതുവരെ അമേരിക്കൻ സൈന്യം പേർഷ്യൻ ഗൾഫ് മേഖലയിൽ തുടരുമെന്ന് അദ്ദേഹം വ്യക്തമാക്കി.
ട്രൂത്ത് സോഷ്യൽ പ്ലാറ്റ്ഫോമിൽ പ്രസ്താവന പങ്കുവച്ച ട്രംപ്, “കരാർ പൂർണമായി നടപ്പിലാകുന്നത് വരെ ഇറാനിലും സമീപപ്രദേശങ്ങളിലും എല്ലാ യുഎസ് സൈനിക സാന്നിധ്യവും തുടരും. ആവശ്യമായ ആയുധശേഷി സൈന്യത്തിനുണ്ട്” എന്ന് പറഞ്ഞു. കൂടാതെ, കരാർ വീണ്ടും ലംഘിക്കപ്പെട്ടാൽ “ലോകം കണ്ടിട്ടില്ലാത്ത ശക്തമായ ആക്രമണം” ആരംഭിക്കുമെന്ന് മുന്നറിയിപ്പും നൽകി.
പാക്കിസ്ഥാന്റെ മധ്യസ്ഥതയിൽ നടന്ന ചർച്ചകൾക്ക് പിന്നാലെ ബുധനാഴ്ചയാണ് അമേരിക്കയും ഇറാനും തമ്മിൽ രണ്ട് ആഴ്ചത്തേക്കുള്ള താൽക്കാലിക വെടിനിർത്തൽ പ്രഖ്യാപിച്ചത്. ഇതിന്റെ ഭാഗമായി ഹോർമുസ് കടലിടുക്ക് തുറക്കാനും ഇറാൻ സമ്മതിച്ചിരുന്നു. എന്നാൽ, ലബനനിൽ ഇസ്രയേൽ നടത്തിയ വ്യോമാക്രമണങ്ങളും മറ്റ് വ്യവസ്ഥകളിലെ ലംഘനങ്ങളും ചൂണ്ടിക്കാട്ടിയാണ് ഇറാൻ കരാറിൽ നിന്ന് പിന്മാറിയത്.
ഇറാൻ പാർലമെന്റ് സ്പീക്കർ മുഹമ്മദ് ബാഗർ ഗാലിബാഫ്, യുറേനിയം സമ്പുഷ്ടീകരണ അവകാശം നിഷേധിച്ചതും, ലബനനിലെ ആക്രമണങ്ങൾ തുടരുന്നതും, ഇറാന്റെ വ്യോമപരിധിയിൽ ഡ്രോൺ കടന്നുകയറിയതും കരാർ ലംഘനങ്ങളായി ആരോപിച്ചു. ഇതിനെ തുടർന്നാണ് കടലിടുക്കിലൂടെ എണ്ണക്കപ്പലുകളുടെ ഗതാഗതം തടഞ്ഞത്.
അതേസമയം, ഇസ്രയേൽ പ്രധാനമന്ത്രി ബെന്യാമിൻ നെതന്യാഹു, ഇറാനുമായുള്ള വെടിനിർത്തൽ ലബനനിൽ ബാധകമല്ലെന്നും ഹിസ്ബുല്ലയ്‌ക്കെതിരായ സൈനിക നടപടി തുടരുമെന്നും വ്യക്തമാക്കി. ലബനനിൽ നടന്ന ആക്രമണങ്ങളിൽ നൂറിലധികം പേർ കൊല്ലപ്പെട്ടതായും റിപ്പോർട്ടുകൾ പറയുന്നു.
സംഭവവികാസങ്ങൾ ആഗോളതലത്തിൽ വലിയ ആശങ്കയ്‌ക്കിടയാക്കി. ഹോർമുസ് കടലിടുക്ക് ലോകത്തിലെ ഏറ്റവും പ്രധാനപ്പെട്ട എണ്ണ ഗതാഗത മാർഗങ്ങളിലൊന്നായതിനാൽ, ഇതിന്റെ അടച്ചുപൂട്ടൽ എണ്ണവിലയിൽ വൻ ഉയർച്ചക്കും സാമ്പത്തിക അനിശ്ചിതത്വത്തിനും കാരണമാകാൻ സാധ്യതയുണ്ട്.
ഇതിനിടെ, ശനിയാഴ്ച പാക്കിസ്ഥാനിൽ നടക്കാനിരിക്കുന്ന സമാധാന ചർച്ചകൾക്ക് യുഎസ് വൈസ് പ്രസിഡന്റ് ജെ.ഡി. വാൻസ് നേതൃത്വം നൽകും. പുതിയ നീക്കങ്ങൾ സംഘർഷം ശമിപ്പിക്കുമോ, അതോ കൂടുതൽ വഷളാക്കുമോ എന്ന ആശങ്കയിലാണ് അന്താരാഷ്‌ട്ര സമൂഹം.
