വീടിന്റെ ഹൃദയമാണ് സ്വീകരണമുറി. ആ വീട്ടിൽ താമസിക്കുന്നവരുടെ വ്യക്തിത്വം, അഭിരുചികൾ എന്നിവ പ്രകടിപ്പിക്കുന്ന ഇടം. അതിഥികളെ സ്വീകരിക്കുന്നതും വീട്ടുകാര്‍ ഒത്തുകൂടുന്നതുമായ സ്വീകരണമുറി എന്നും പോസിറ്റീവ് ആയി ഇരിക്കാന്‍ ചില കാര്യങ്ങൾ ശ്രദ്ധിക്കേണ്ടതായിട്ടുണ്ട്.
ധാരാളം ഫര്‍ണിച്ചറുകള്‍ സ്വീകരണമുറിയിൽ ഒഴിവാക്കുക. ഇരിപ്പിടം കിഴക്കോ വടക്കോ അഭിമുഖമായിക്രമീകരിക്കുന്നത് അനുകൂല ഊർജ്ജപ്രവാഹത്തിനു കാരണമാകും.
ഹാളിലേക്ക് പ്രധാനവാതിൽതുറന്ന് കയറുമ്പോൾ കണ്ണാടി കാണാൻ പാടില്ല. പ്രധാന വാതിലിന് നേരെ പലരും കണ്ണാടി ഉള്ള ഷോകേസ് വച്ചിട്ടുണ്ടാകും. അത് പാടില്ല.
മരിച്ചുപോയവരുടെ ചിത്രങ്ങൾ വീട്ടിൽ വയ്‌ക്കുന്നതിനെപ്പറ്റി വ്യത്യസ്തമായ അഭിപ്രായങ്ങളുണ്ട്. പൂർവികരുടെ ചിത്രങ്ങൾ പ്രധാനഹാളിൽ വയ്‌ക്കുന്നതിൽ തെറ്റില്ല പക്ഷേ തെക്കോട്ട് ദർശനമായി വരുന്നരീതിയിൽ വേണം വയ്‌ക്കാൻ.
പുറത്തു പോയി വന്നയുടനെ ബാഗ്, കുട എന്നിവ അലക്ഷ്യമായി സോഫയിലോ ടീപോയിലോ ഇടാൻ പാടില്ല. മാഗസിനുകൾ, പത്രക്കെട്ടുകൾ എന്നിവ ഹാളിൽ നിന്ന് ഒഴിവാക്കുക.കഴുകിയുണങ്ങിയ തുണികൾ പിന്നീട് മടക്കിസൂക്ഷിക്കുന്നതിനായി സോഫയിൽ കൂട്ടിയിടുന്നതും നന്നല്ല.
ആകർഷണ വസ്തുക്കളിലെയും അലങ്കാര വിളക്കുകളിലെയും പൊടിയും മാറാലയും യഥാസമയം വൃത്തിയാക്കുക. മുഷിഞ്ഞതും പൊട്ടിയതുമായവ കളയാൻ മടിക്കരുത്.
വാസ്തു ശാസ്ത്രമനുസരിച്ച് സ്വീകരണ മുറിയിൽ അക്വേറിയം തെറ്റായ ദിശയിൽ വയ്‌ക്കരുത് . സ്വീകരണമുറിയുടെ വടക്ക് കിഴക്ക് ദിക്കിലാണ് അക്വേറിയം വയ്‌ക്കേണ്ടത്.
ഉരുളിയിൽ വെള്ളം നിറച്ചു പൂക്കൾ ഇട്ടുവയ്‌ക്കുന്നത് അനുകൂല ഊർജ്ജത്തിന് കരണമാകുമെങ്കിലും പൂക്കൾ ചീഞ്ഞു വെള്ളം മലിനമായാൽ വിപരീതമാവും ഫലം.
ഇരുണ്ട നിറങ്ങൾ സ്വീകരണമുറിയിൽ ഒഴിവാക്കണം. വെള്ള,മഞ്ഞ, പച്ച തുടങ്ങിയ ഇളം നിറങ്ങളാണ് അഭികാമ്യം
